O certificado covid seguirá sendo necesario en hospitais e residencias até o 23 de abril

O Tribunal Superior de Xustiza de Galicia (TSXG) autorizou este xoves á Xunta a prorrogar na Comunidade galega ata o próximo 23 de abril a obrigación de presentar o certificado Covid-19 de vacinación, recuperación ou proba diagnóstica negativa para visitar aos pacientes ingresados en centros hospitalarios e sociosanitarios, residenciais de maiores e de persoas con diversidade funcional.

Así o informou o TSXG, os maxistrados destacaron no novo auto que a medida trata "de protexer a persoas que presentan unha especial vulnerabilidade", as cales se atopan en "contornas de elevado risco epidemiolóxico", pois trátase de "ambientes pechados, nos que o propio nivel de dependencia das persoas ingresadas ou residentes favorece o establecemento de contactos próximos e prolongados cos coidadores, o que aumenta o risco de transmisión e de contaxio".

Ademais, o maxistrado indican que, con frecuencia, os residentes presentan "algún grao de discapacidade ou deterioración cognitiva que pode dificultar o mantemento das medidas de prevención, como son a hixiene de mans e respiratoria ou o uso adecuado da máscara". Así mesmo, a Sección Terceira da Sala do Contencioso-administrativo do TSXG advirte de que "non pode levar a engano a tendencia decreciente da taxa de incidencia do virus, nin a previsión anunciada do fin da obrigatoriedade da máscara en espazos interiores".

Hospital da Coruña / Europa Press. / Europa Press