A Asociación Galega de Matronas crítica que se paralice a súa inclusión nas plantas de puerperio

A Asociación Galega de Matronas (AGAM) criticou a paralización da proposta de inclusión das matronas nos servizos de planta de puerperio que "desde hai un tempo" solicitaban ao Servizo Galego de Saúde (Sergas).

O colectivo destaca que o proxecto elaborado desde a dirección da área Sanitaria da Coruña e Cee, en concreto desde a coordinación do Hospital Materno-infantil Teresa Herrera, "parecía que ía dar o seu froito ao converterse na primeira maternidade galega que ía incorporar matronas na planta de puerperio".

A asociación lembra que esta situación xa se produciu durante as primeiras ondas da covid-19 e sinala tamén que esta maternidade conta con matronas en planta desde hai anos, que atenden ás xestantes hospitalizadas.

Por iso, a entidade asegura estar "sorprendida e decepcionada" tras coñecer que esta proposta de mellora da calidade asistencial das mulleres galegas e as súas familias "foi paralizada nos servizos centrais do Sergas".

Así mesmo, as profesionais da asociación consideran "inxusto" este trato cara á saúde das mulleres, ao sinalar que se lles impide "obter unha mellor calidade asistencial", así como cara á profesión de matrona. "Consideramos, ademais, que prescindir das matronas nos servizos de planta de puerperio resultaría unha decisión ineficiente en canto ao aproveitamento de recursos económicos e humanos", apunta.

Por todo iso, a Asociación Galega de Matronas sinalou que remitiu a semana pasada un escrito á Consellería de Sanidade no que piden que se estude de novo a viabilidade da proposta e animan ao Sergas a aproveitar esta "fantástica oportunidade" para mellorar a atención recibida en obstetricia con enfermeiras especialistas nesa área: as matronas.