O 62% dos impostos de Inditex non son pagados en España

2.165 millóns de euros pagou o xigante Inditex en impostos directos. Deses, o 38% do total no Estado.  Ademais, pagou o 23% destes impostos na Unión Europea (sen contar a España), con 497 millóns de euros, o 16% en América (357 millóns de euros), o 13% en países europeos non comunitarios (272 millóns de euros) e o 10% en Asia e o resto do mundo (218 millóns de euros).

“A maior contribución xerada en España derívase da actividade de forte valor engadido que xera ao ser o centro de exportación de todos os seus produtos de moda desde o exterior”, apuntou a empresa nun comunicado.

Recadación tributaria 

A compañía destacou que a contribución tributaria total aos mercados nos que desenvolve a súa actividade foi de 4.304 millóns de euros en 2013, entre impostos directos (2.139 millóns de euros) e contribución tributaria recadada, onde se inclúe o IVE ou o IRPF, con 2.139 millóns de euros.

Deste importe, o 68%, é dicir, 1.456 millóns de euros, recadouse en Europa, sen incluír España, que sumou 405 millóns de euros, o 19% do total. Así mesmo, Inditex ingresou en nome das facendas públicas 156 millóns de euros en América, un 7% do total, mentres que en Asia e o resto do mundo esa cantidade supuxo 122 millóns de euros, un 6% do total.

Con todo, Inditex rexistrou un beneficio neto de 2.377 millóns de euros no seu ano fiscal 2013-2014 (do 1 de febreiro de 2013 ao 31 de xaneiro de 2014), o que supón un incremento do 1% respecto ao exercicio anterior.

Vendas

As vendas do grupo situáronse en 16.724 millóns de euros, o que representa un aumento do 5% e do 8% a tipos de cambio constante. O grupo de Amancio Ortega destacou que as vendas en superficie comparable incrementáronse un 3%, sobre o 6% do exercicio anterior.

Por áreas geógraficas, Europa, sen España, achegou o 45,9% das vendas do grupo, fronte ao 45,4% de hai un ano, mentres que Asia contribuíu co 20,4% das vendas, sobre o 19,7% dun ano antes. Pola súa banda, España achegou ás vendas do grupo un 19,7% do total, fronte ao 20,7% do peche do exercicio precedente, e América, o 14%, dúas décimas menos que en 2012.