Velada especial nun sepulcro megalítico
Este verán o dolmen de Dombate ofrece unha proposta diferente para as noites de xullo e agosto. Esta referencia turística da Costa da Morte ofrece a partir de hoxe visitas nocturnas. O sepulcro, duns 5000-6000 anos de antigüidade e situado en Cabana de Bergantiños, será o escenario espectacular dunha cita aberta a todo o público e que se repetirá todos os venres de verán.
Por GC Tendencias | A Coruña | 04/07/2014 | Actualizada ás 16:02
O primeiro encontro será hoxe venres a partir das once da noite xunto ao guía Anxo Eiroa, que usará a iluminación gradual do edificio que protexe o dolmen máis unha lanterna, para ofrecer unha visita informativa mais tamén sensorial. Música de fondo e a escuridade nocturna que envolve o dolmen axudarán a crear un ambiente especial ao longo da hora que durará a visita.
A actividade terminará no centro de interpretación do dolmen de Dombate, onde os visitantes poderán ver reproducións das pinturas e gravados que foron achados nas paredes do dolmen. Mesmo poderase escoitar poesía nesta visita guiada diferente, máis participativa e que xoga con todos os sentidos.
Anxo espera que o partido Brasil-Colombia non eclipse este “pequeno experimento” que en Dombate decidiuse poñer en marcha tras o éxito da ‘ruta das estrelas’ que se organiza en agosto dende fai varios anos.
Aínda que para aqueles que non poidan acudir hoxe (ou non queiran perder o partido) a visita nocturna vaise repetir todos os venres de xullo e agosto. Será a partir das 23h ata medianoite e o acceso é libre e gratuíto.
As visitas diurnas ao dolmen de Dombate manteñense de martes a domingo de 11.00 a 14.00 e de 16 a 20.00 horas. Tamén hai programada unha nova ‘Ruta das estrelas’, unha velada que combina arqueoloxía e astronomía, para o día 8 de agosto.
Máis información na web de Deputación da Coruña.
