Galicia mostra a súa repulsa polo asasinato machista dunha muller galega en Tenerife
Na concentración da Xunta coincidiron os dous presidentes, o saínte en funcións, Alberto Núñez Feijóo, e o electo, Alfonso Rueda.
Por Europa Press / Redacción | SANTIAGO DE COMPOSTELA | 13/05/2022 | Actualizada ás 14:08
Institucións de toda Galicia gardaron na mañá deste venres un minuto de silencio polo asasinato machista dunha muller galega na localidade tinerfeña de Arona, ocorrido o pasado mércores, para expresar a súa repulsa por estes feitos e a solidariedade de toda a sociedade galega coa familia da vítima, residente en Vigo.
En Santiago, ás 12,00 horas, persoal e membros do Goberno galego gardaron un minuto de silencio ante as portas do edificio administrativo de San Caetano, que terminaron nun aplauso. Neste acto estiveron presentes tanto o presidente en funcións, Alberto Núñez Feijóo, como o presidente electo, Alfonso Rueda, para quen foi o seu primeiro acto oficial despois de ser elixido este xoves polo Parlamento.
Tras o minuto de silencio, a conselleira de Traballo e Igualdade, María Jesús Lorenzana, expresou a "máxima condena" de todo o Goberno galego cara a este crime machista e as condolencias á familia da muller asasinada. Paralelamente, fixo fincapé en que "existen medios" para loitar contra a violencia machista, "que se pode denunciar e que é imprescindible que tanto as mulleres que están nesta situación como os seus achegados denuncien a situación na que se atopan".
En relación a este caso, a Xunta púxose "a disposición da familia" e en contacto coas autoridades canarias para ofrecer a máxima colaboración en calquera cousa que poida ser necesaria. Clotilde, de 83 anos, foi asasinada presuntamente polo seu marido o pasado mércores na localidade tinerfeña de Arona. Aínda que ambos eran orixinarios e residentes en Vigo, pasaban longas tempadas na illa canaria dado que alí residía unha filla do matrimonio.
OUTRAS CONCENTRACIÓNS
As concentracións tamén se repetiron ante varios concellos, na delegación do Goberno en Galicia e no catro subdelegacións, onde se gardou un minuto de silencio. Na Coruña, o delegado do Goberno, José Miñones, expresou o seu "afecto" á familia da vítima e condenou " unha vez máis" a violencia machista.
Sobre o caso, dixo que se trata dun crime "sen sentido", no que "non existen denuncias previas", polo que instou a "seguir trasladando a existencia do 016 para que denuncien e podamos axudarlles". Pola súa banda, a Asociación Veciñal de Teis convocou para este sábado a toda a veciñanza de Vigo, ás 14,00 horas, nunha concentración ante o mercado de Teis, onde traballou a vítima.
