Santiago recupera as fogueiras de San Xoán tras dous anos sen elas pola pandemia
Por E.P. | Santiago de Compostela | 30/05/2022 | Actualizada ás 14:10
Santiago de Compostela volverá ter este ano fogueiras en espazos públicos na noite de San Xoán, tras dous anos suspendidas por mor dos efectos da pandemia. O alcalde compostelán, Xosé Sánchez Bugallo, informou este luns de que a Xunta de Goberno Local aprobou as normas que rexerán este ano para as fogueiras.
Así, explicou, as fogueiras situadas en zonas públicas, de barrios ou asociacións, terán de prazo entre o 1 e o 16 de xuño para presentar a súa solicitude, e no caso das fogueiras privadas, o prazo será entre o 1 e o 22 de xuño.
Esta será a primeira ocasión desde a festa de San Xoán de 2019 que as fogueiras volvan aos espazos públicos de Santiago. A pandemia de covid-19 limitounas a eventos privados tanto no ano 2020 como en 2021.
