Por E.P. | SANTIAGO DE COMPOSTELA | 30/05/2022 | Actualizada ás 18:10
Unha tese desenvolvida pola investigadora da USC María José Ginzo Villamayor constatou que Galicia se atopa dividida en cinco sectores segundo a "rexionalización dos apelidos", áreas que, á súa vez, se aproximan ás divisións eclesiásticas ou dioceses. A investigación partía da base de que a análise dos patróns que se observan na distribución dos apelidos ao longo dun territorio proporciona datos sobre movementos e características das poboacións.
Para a responsable da investigación, as similitudes entre a estrutura de poboación identificada no estudo dos apelidos e as divisións eclesiásticas confirma que ambos os tipos de información "están relacionados con condicionantes históricos antigos", tras "relacións estreitas e duradeiras no tempo entre os poboadores destas áreas" que levan a unha distribución concreta dos apelidos.
Esta tese céntrase na introdución de novas técnicas estatísticas para o tratamento e datos e modelización en xeolingüística, concretamente, en datos de onomástica en Galicia. De forma máis específica, a tese atende a dous problemas principais: por unha banda, a construción de rexións de apelidos en Galicia e, por outra, o estudo e modelización de patróns espaciais e espazo-temporais dos apelidos.
"Os apelidos poden ser utilizados como unha fonte de información para caracterizar á poboación dunha rexión", explica a investigadora.
A análise tamén profundou no caso asturiano, a partir da información cedida pola Sociedade Asturiana de Estudos Económicos e Industriais. Segundo o estudo comparativo dos datos onomásticos e lingüísticos, concluíuse que a rexionalización dos apelidos en Asturias desemboca en catro rexións onomásticas, similares ás áreas dialectales tradicionalmente recoñecidas no dominio asturiano.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.