Morre unha persoa ao caer cun tractor por un barranco en Monterrei
Ocorreu na parroquia de Vences. Un accidente similar produciuse na Gudiña, cun todoterreo.
Por Europa Press / Redacción | Ourense | 31/05/2022 | Actualizada ás 18:46
Unha home de 41 anos morreu na tarde deste martes ao caerse por un desnivel cando conducía un tractor nunha zona de monte no concello ourensán de Monterrei.
Segundo informan fontes do 112 Galicia, ocorreu na parroquia de Vences ao redor das 16,45 horas, cando unha persoa chamaba á central de emerxencias para avisar do ocorrido.
Seguidamente, o 112 avisou á Garda Civil, aos bombeiros de Verín e ao 061-Urxencias Sanitarias, que mobilizou un helicóptero medicalizado con base en Ourense ata o lugar. Con todo, o persoal desprazado non puido facer nada por salvar a vida desta persoa.
De acordo coas mesmas fontes, a vítima participaba nunha curta de madeira no monte e caeu por un barranco co tractor.
ACCIDENTE NA GUDIÑA
Un home que circulaba nun todoterreo resultou ferido na tarde deste martes ao caer o vehículo por un barranco de 15 metros e terminar envorcado tras chocar contra unha árbore.
Debido ás feridas sufridas, o home tivo que ser trasladado ao centro hospitalario de referencia nunha ambulancia, segundo informa o 112 Galicia.
En concreto, este sinistro ocorreu a 200 metros da Gudiña, na entrada desde Vilariño. Foi o persoal de Urxencias Sanitarias de Galicia-061 os que chamaron aos 112 minutos antes das 15,15 horas para alertar do sinistro.
Seguidamente, a central de emerxencias puxo a situación en coñecemento do GES do municipio e da Garda Civil de Tráfico.
