O Goberno central descarta desposuír os Franco da Casa Cornide
Afirma que non hai constancia de que esa propiedade poida ser de titularidade estatal.
Por Europa Press / Redacción | Madrid | 04/06/2022 | Actualizada ás 11:39
O Goberno central non prevé iniciar xestións para desposuír os herdeiros do ditador Francisco Franco da Casa Cornide, un inmoble situado na cidade vella da Coruña, dado que non ten constancia de que esa propiedade poida ser de titularidade estatal.
Así llo comunicou o Executivo o deputado de Galicia En Común no Congreso, Anton Gómez Reino, quen se interesou polo cumprimento dunha proposición non de lei coa que o Congreso evidenciou o seu apoio á intención do Concello coruñés de recuperar esa propiedade para o patrimonio público.
Foi o 11 de marzo de 2021 cando a Comisión Constitucional do Congreso aprobou, co voto en contra de Vox e a abstención de Ciudadanos, ese texto do propio Gómez Reino que instaba o Goberno a "apoiar as iniciativas" tomadas polo Concello da Coruña.
Gómez Reino preguntou ao Executivo se avanzara algo nese mandato e se tiña previsto presentarse nas causas xudiciais "abertas ou por abrir" a iniciativa do consistorio con obxecto de recuperar a casa para patrimonio público.
Na súa resposta, o Goberno detalla que na Dirección Xeral do Patrimonio do Estado, dependente do Ministerio de Facenda e Función Pública, "non constan indicios" de que a casa Cornide "poida ser de titularidade estatal".
Por iso, explica que "en principio", non "se considerou pertinente iniciar un expediente de investigación ou recuperación patrimonial pola Administración Xeral do Estado".
