Seis meses de prisión por estafar 6.000 euros a un ourensán con discapacidade

Os dous ourensáns acusados de estafar 6.000 euros a un veciño cunha discapacidade recoñecida do 65% aceptaron este mércores seis meses de prisión e recoñeceron os feitos.

Na sesión que acolleu a Audiencia Provincial de Ourense, os dous homes, que se enfrontaban a unha pena de dous anos e medio de cárcere por un delito de estafa, chegaron a un acordo e aceptaron a pena de seis meses, que quedará en suspenso se non delinquen nun prazo de entre dous e tres anos.

O sucedido remóntase a 2017, ano no que, co ánimo de obter un beneficio económico, fixéronse pasar por amigos dun veciño que cobraba unha paga por discapacidade. Segundo recolle o escrito de Fiscalía, entre decembro dese ano e xaneiro do 2018, subtraéronlle 6.000 euros.

Esa foi a cantidade ingresada por un dos acusados un día antes da celebración do xuízo, o principal motivo polo que se rebaixou a pena, ao considerarse reparación do dano.

Ademais, o Ministerio Fiscal apreciou atenuante de dilacións indebidas, porque se incumpriu o prazo máximo de instrución de seis meses. Así pois, a acusación particular e as defensas adheríronse á petición rebaixada e os acusados aceptaron a condena.

A Audiencia Provincial de Ourense celebra o xuízo contra dous homes acusados de estafar a un veciño, cun grao de discapacidade do 65%, ou co que finxiron unha amizade. | Fonte: Europa Press