Rueda defende a supresión da Tarxeta Básica para persoas vulnerables: "Quen queira traballar, pode facelo"

O presidente da Xunta, Alfonso Rueda, volveu insistir en que a Xunta suprimiu a Tarxeta Básica, que facilitaba axudas económicas a familias en situación vulnerable para comprar produtos de alimentación, hixiene ou farmacia, porque "naceu nun momento no que non era posible traballar" --xa que foi posta en marcha no ano 2020 --, con todo, engadiu, "agora, afortunadamente, a situación cambiou".

"Naquel momento non había mobilidade e non había posibilidade de traballar. A razón dese apoio xa non existe, por tanto esa excepcionalidade xa non está e esa é a razón de que se suprima esa axuda, que naceu nunha situación na que moita xente non podía traballar e xerar ingresos", manifestou.

Nunha visita á nova UCI do Hospital de Santiago de Compostela, Rueda recoñeceu que "a situación segue sendo difícil", pero, dixo, quen queira traballar, se hai postos de traballo, pode facelo; non é como antes".

Por este motivo, xustificou que se suprima esta axuda, pero defendeu que "se manteñen todas as demais e exporanse outras novas en función dos acontecementos". "A Xunta mantén axudas para persoas que están nunha situación complicada", reivindicou.

BNG

A viceportavoz parlamentaria do BNG, Olalla Rodil, esixiu á Xunta que rectifique a súa decisión de suprimir a Tarxeta Básica e que lle dea "un carácter permanente" como unha "ponte" ata que as persoas beneficiarias poidan acceder a prestacións como a Renda de inclusión social de Galicia (Risga) ou o Ingreso Mínimo Vital (IMV).

A dirixente nacionalista lembra que foi a "única medida" de emerxencia que existía ata o momento, xa que a Xunta foi "incapaz de adoptar nin unha soa con carácter extraordinario para rescatar os sectores da poboación máis empobrecidos" ante a "brutal crise de prezos".

"O que lle pedimos ao Goberno galego e ao PP é que empaticen, que teñan a sensibilidade que necesita un momento como o actual e que manteñan a Tarxeta Básica e que a regulen para darlle un carácter permanente como ponte ata que as persoas que se atopan en situación de pobreza ou exclusión social poidan acceder a outras prestacións económicas como a Risga ou o IMV", detallou.

PSdeG

O secretario xeral do PSdeG, Valentín González Formoso, denunciou este sábado que a decisión da Xunta de suprimir a Tarxeta Básica "vai en sentido contrario ás necesidades dos galegos". Formoso censurou que se suprima "unha axuda fundamental" para "75.000 galegos con menos recursos".

Nesta mesma liña, o líder dos socialistas criticou a situación de "saturación" da sanidade galega e lamentou a "pasividade" da Xunta ante estes feitos. Así, reclamou ao presidente da Xunta un aumento do persoal sanitario ante as vacantes por vacacións que, engadiu, "poden provocar unha tensión do sistema", e pediu un incremento do orzamento en atención primaria.

Ademais, tamén reprochou que o Executivo de Alfonso Rueda "non tome ningunha medida" ante as dimisións recorrentes en "todos os hospitais de referencia".