Por E.P. | MADRID | 12/07/2022 | Actualizada ás 11:42
A líder do BNG, Ana Pontón, criticou que o presidente do Goberno, Pedro Sánchez, non dedicase "nin unha soa palabra" a Galicia, pero si fixese anuncios para outras comunidades como o País Vasco, Cataluña ou Estremadura.
A portavoz nacional do Bloque pronunciouse deste xeito nun fío de mensaxes publicado no seu perfil da rede social Twitter, na que pon en valor o anuncio de crear un imposto aos "escandalosos beneficios do lobby enerxético e bancario" como, segundo sinala, "pedía o BNG". Con todo, censura que o titular do Executivo estatal non pronunciase "nin unha soa palabra para Galicia", pero si fixese anuncios para "Euskadi, Cataluña ou Estremadura". "Urxe máis que nunca cumprir o acordo de investidura e cumprir coa palabra dada aos galegos", subliña.
Ademais, a líder dos nacionalistas galegos considera necesario "ir máis aló" nas medidas para controlar os prezos e "acabar cos beneficios caídos do ceo". Tamén insiste na necesidade de poñer en marcha unha empresa pública de enerxía e de poñer "topes" aos prezos do gasóleo e da luz mentres continúe a "inflación desbocada".
ALFONSO RUEDA
O titular do Goberno galego, Alfonso Rueda, mostrou o seu desexo de que as necesidades de Galicia se aborden no Debate sobre o estado da nación. "Gustaríame que Galicia estivese presente nos anuncios que poida facer o presidente do Goberno", asegurou. A preguntas da prensa en Santiago, o presidente do Goberno galego sinalou que espera que o titular do Executivo central, Pedro Sánchez, se refira a "algún dos compromisos que lle constan" sobre Galicia. "Celebrariámolo, recoñeceriámolo moitísimo", afirma.
Así, referiuse a cuestións como a "axilización" da xestión de fondos Next Generation, "decisións en materia sanitaria que só lle corresponden ao Estado e que moitísimas comunidades autónomas están a pedir", así como "empezar a falar xa" do modelo de financiamento económico, "non seguir aprazando indefinidamente" ese tema.
Igualmente, espera anuncios de tipo fiscal, "aos que se comprometeu hai meses" Sánchez na Conferencia de Presidentes da Palma. Sostén que "hoxe sería o día de facer anuncios máis potentes". Rueda cre que sería unha "magnífica noticia que houbese anuncios nese sentido, e moito máis se incumben directamente Galicia".
BNG
O portavoz do Bloque Nacionalista Galego (BNG), Néstor Rego, lamentou este martes que nos anuncios que o presidente, Pedro Sánchez, fixo no arranque do Debate sobre o estado da Nación faltan "medidas estruturais", pero garantiu que o seu partido apoiará as que van "na boa dirección", como os impostos ás eléctricas e os bancos.
O anunciado por Sánchez son "medidas conxunturais e temporais", segundo valorou tras a intervención do presidente, aínda que saudou os impostos ás eléctricas e os bancos a pesar de ter "dúbidas" por como están "formuladas". "Esperamos que se faga ben e apoiaremos medidas que vaian na boa dirección", dixo.
Doutra banda, a intervención do presidente serviu ao BNG de "constatación" de que Galicia está "ausente" das "prioridades e preocupacións" do Goberno, xa que non mencionou á Comunidade Autónoma no seu discurso. Por iso, indicou que o seu partido continuará reclamando ao Executivo que cumpra cos acordos contemplados no marco da investidura, sobre todo os que afectan a infraestruturas.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.