Marta Ortega asegura que Inditex "ten un gran futuro por diante"
Destaca a "visión, o tesón e dedicación" de Amancio Ortega, ausente na xunta, así como o "agarimo que demostra cada día" á compañía.
Por E.P. | Santiago de Compostela | 12/07/2022 | Actualizada ás 13:18
A presidenta de Inditex, Marta Ortega, recoñeceu na súa estrea á fronte da compañía na xunta xeral de accionistas, que se está celebrando en Arteixo, que a firma de moda "ten un gran futuro por diante". "Recibimos algo máis que unha empresa e que un lugar de traballo. Temos nas nosas mans unha tremenda responsabilidade e que ten un gran futuro por diante que nos obriga a dar o mellor de nós mesmos", asegurou no seu primeiro discurso aos accionistas da compañía.
Marta Ortega tomou o pasado 1 de abril o temón de Inditex con case 6.500 tendas repartidas polo mundo, uns beneficios marca e a súa aposta por manter o modelo de negocio, pechándose así a etapa de Pablo Isla, quen deixaba a presidencia tras 17 anos na compañía. A filla do fundador da firma, Amancio Ortega, reiterou a súa "confianza" de fcara ao futuro da compañía. "Estamos seguros de que a capacidade de innovación de Inditex nos permitirá crecer como empresa cada día", sinalou.
"Inditex é o lugar onde crecín persoal e profesionalmente, onde sempre quixen estar. É a fonte dos valores que comparto e o proxecto ao que lle seguirei dedicando todo o meu esforzo", recalcou a presidenta, reiterando que a matriz de Zara está preparada para "afrontar os retos do futuro".
Marta Ortega recoñeceu na súa intervención a "sorte" que ten de "formar parte desta historia única, que non é o mérito de ninguén en particular, porque é o de todos". "O sentimento de responsabilidade é inmenso, pero o orgullo de representar o mellor equipo supérao con fartura", asegurou.
Así, a presidenta de Inditex non dubidou en facer unha chiscadela ao seu pai, o gran ausente na posta de longo da súa filla na xunta xeral de accionistas. "Sentimos un profundo respecto, admiración e respecto por quen fixeron Inditex o que é hoxe, pero en especial ao señor Ortega pola súa visión, o seu tesón e a súa dedicación absoluta e polo agarimo que demostra cada día á compañía", subliñou.
Marta Ortega, emocionada no seu primeiro discurso antes os accionistas, quixo trasladar aos accionistas o que é Inditex, que é sobre todo "persoas". "Inditex sempre foi antes que calquera cousa persoas, persoas que traballan con moita dedicación, que xamais se renden, que non se conforman e que buscan mellorar en todo o que fan", recoñeceu.
"Inditex son os nosos provedores, que colaboran cada día connosco e os nosos clientes, pero reitero Inditex é persoas, e como persoas, ten acertos, ilusións, pero xamais se detén e sempre mira cara a adiante", recalcou a presidenta aos accionistas da firma téxtil. Na aposta pola sustentabilidade, Marta Ortega sinalou que a multinacional téxtil tamén é responsable ante a sociedade. "Queremos xerar un impacto positivo non só no presente, senón na herdanza que deixamos no futuro".
ENTRA NO ACCIONARIADO DUNHA EMPRESA
Inditex anunciou a súa entrada por primeira vez no accionariado dunha empresa, neste caso na 'startup' Circ, e non descartou a realización de operacións similares, segundo anunciou o conselleiro delegado da multinacional, Óscar García Maceiras, no transcurso da xunta xeral de accionistas.
"Esta é a primeira operación de entrada no capital doutra empresa e é unha vía que deixamos aberta, o identificar proxectos e iniciativas que nos poidan axudar na nosa estratexia de sustentabilidade e na súa aceleración", avanzou García Maceiras aos accionistas.
Inditex tamén anunciou a posta en marcha dun proxecto de agricultura rexenerativa en dous Estados da India que permitirá a rexeneración de máis de 300.000 hectáreas de cultivo, que terá un "impacto positivo tanto social como ambiental", segundo indicou o conselleiro delegado.
