O PP saca adiante un teito de gasto "adaptado" á crise que a oposición tida de remendo
Nacionalistas e socialistas din que o crecemento previsto neste teito de gasto é menor ao impacto da inflacción.
Por Europa Press / Redacción | SANTIAGO DE COMPOSTELA | 03/08/2022 | Actualizada ás 13:16
O PPdeG sacou adiante en solitario o teito de gasto non financeiro para 2023, que será o máis alto da historia ao alcanzar os 12.599 millóns (+8,2%), entre críticas da oposición polo que consideran un "corpiño" que non atende a unha situación "excepcional", dado que o crecemento previsto é menor ao impacto da inflación.
Na súa intervención no pleno do Parlamento galego, o conselleiro de Facenda, Miguel Corgos, reiterou a exposición realizada o pasado luns na aprobación deste teito de gasto por parte do Consello da Xunta, de forma que apelou á "prudencia extrema" nun contexto de "deterioración" das perspectivas económicas mundiais, cunha inflación "persistente" e unhas previsións marcadas pola "incerteza".
Así, Corgos expresou que este tope de gasto empregarase para elaborar uns orzamentos de 2023 --que entrarán na Cámara antes do 20 de outubro-- "responsables, útiles e adaptados á actual conxuntura", que buscarán apoiar a familias e a empresas "mais vulnerables" pola inflación crecente.
Igualmente, reiterou que se van a consolidar "todas as rebaixas fiscais" destes anos, á vez que se incluirán os anuncios que realizou Alfonso Rueda no seu discurso de investidura, tales como unha redución do primeiro tramo do IRPF --do 9,4% ao 9%--, así como que as familias galegas con dous fillos menores de 25 anos contarán cos mesmos beneficios fiscais, a efectos de IRPF, que gozan a día de hoxe as familias numerosas.
En fronte, Noa Presas (BNG) tachou de "corpiño" este teito de gasto, que ve "rutineiro" ao non atender a unha "situación excepcional", que conta cunha subida menor que a inflación existente, "o que non vai permitir asumir o que custa de máis" soportar os custos dos servizos públicos.
Nesta liña, Luís Álvarez (PSdeG) xustificou a negativa do seu grupo a este teito de gasto, xa que considera que non atenderá aos sectores "necesitados", debido á supresión da Tarxeta Básica, así como a falta de atención a un sistema sanitario "colapsado" e a miles de dependentes que non contan con prestación.
