Rueda insiste no seu "non rotundo" a unha taxa turística
Con todo, di estar aberto a "escoitar" ao alcalde de Santiago.
Por Europa Press / Redacción | SANTIAGO DE COMPOSTELA | 31/08/2022 | Actualizada ás 14:38
O presidente da Xunta, Alfonso Rueda, mantense na negativa a implantar unha taxa turística, aínda que apunta que está aberto a "escoitar" o que teña que trasladar o alcalde de Santiago, Xosé Sánchez Bugallo, sobre esta cuestión.
Nunha entrevista coa Cadena SER, o alcalde de Santiago, Xosé Sánchez Bugallo, dixo que cre necesario "reflexionar" acerca da implantación unha taxa turística na capital de Galicia, pois el mesmo comenta ter un cambio de postura respecto do que pensaba hai uns anos.
Preguntado por esta cuestión, Rueda afirmou estar "aberto" a "escoitar calquera cousa que comente o Concello de Santiago de modo oficial e argumentado". "Vostedes saben ata agora a postura da Xunta de Galicia", lembrou en relación a este rexeitamento.
"Ata que o municipio de Santiago non nos comunique nada, a día de hoxe non nolo comunicou, é moi difícil valorar iso, ata agora tiñan unha postura, se a cambiaron, gustaríame escoitalo, saber cales son as razóns e as consideracións", asegura.
E é que lembra que "segue en vigor" a postura da Xunta de que "é posible crecer e conxugar a sustentabilidade e o turismo de calidade con máis turistas en xeral en toda Galicia". "É moi importante e de máximo interese xeral que actuemos coordinados na cidade que é destino de todas as rutas xacobeas", remarca Alfonso Rueda.
"Son cousas que hai que falar co Concello, e en función diso opinar, ata agora traballamos bastante coordinadamente, gustaríame seguir facéndoo. Gustaríame saber se é algo firme, algo que se está expondo e cales son as razóns", apunta. Este mesmo mes, nunha entrevista con Europa Press, Alfonso Rueda mostrouse tallante ante a implantación dunha taxa turística galega: un "non" rotundo.
