Por Europa Press / Redacción | Santiago de Compostela | 09/09/2022 | Actualizada ás 16:08
A Oficina Técnica da Seca constatou un leve incremento dos caudais dos ríos galegos que, no entanto, seguen un 32% máis baixos que a media da última década. A conselleira de Infraestruturas e Mobilidade, Ethel Vázquez, presidiu este venres unha nova reunión da Oficina Técnica da Seca, na que tamén participaron os responsables de Augas de Galicia, Teresa Gutiérrez e Gonzalo Mosqueira, así como representantes de Protección Civil, Meteogalicia e da Consellería do Medio Rural.
Na reunión constatouse que os caudais non están aínda estabilizados, a pesar da pequena melloría rexistrada con respecto ao último encontro, celebrado o pasado 22 de agosto, cando os caudais estaban un 34% por baixo da media da serie histórica. No que se refire aos encoros, o nivel nos últimos quince días seguiu descendendo, a pesar das choivas rexistradas. Así, a día 5 de setembro, os encoros de abastecemento da demarcación hidrográfica de Galicia-Costa rexistraban unha ocupación do 65,8%.
En relación á situación meteorolóxica, o mes de agosto resultou seco e as previsións para este mes apuntan á posibilidade de choivas, pero as autoridades chaman a ser prudentes e seguir coas medidas de aforro mentres os caudais dos ríos e as reservas dos encoros non estean estabilizadas.
POR ZONAS
Na reunión avaliáronse de forma detallada os sistemas da Demarcación Hidrográfica Galicia-Costa, onde se observou unha leve melloría na zona da Mariña lucense, aínda que non é suficiente como para que se cumpran os parámetros para que poida saír da situación de seca prolongada na que se atopa.
A Oficina Técnica da Seca tamén constatou que, nos últimos quince días, o encoro de Cecebre experimentou un importante descenso no volume de auga, pois está ao 54%, cando o 22 de agosto a súa ocupación era do 64%, cun descenso de 10 puntos en 15 días.
Neste sentido, seguindo os criterios recollidos no Plan de Seca, a situación fai necesario activar a prealerta por escaseza no sistema do río Mero, Arteixo e ría da Coruña. En todo caso, a conselleira explicou que non é unha situación que preocupe especialmente, tendo en conta que o abastecemento nesta área estaría garantido pola auga almacenada no lago da antiga mina de Meirama.
A Oficina Técnica da Seca tamén acordou manter a situación de prealerta por escaseza nos sistemas do río Lérez e ría de Pontevedra; no sistema do río Tambre e ría de Muros e Noia; na bacía do río Grande e dos ríos que alcanzan a ría de Camariñas e a costa de Cabana, Laxe e Muxía; e na conca do río Anllóns.
Ademais continúan os valores de prealerta por escaseza nos subsistemas de Zamáns e Baiona, que abastecen aos concellos de Nigrán, Baiona e Gondomar, ademais dunha pequena parte do concello de Vigo. Ante esta situación, a Xunta reitera o chamamento á contención do consumo e á utilización responsable da auga, evitando usos innecesarios para garantir o abastecemento e o mantemento do caudal ecolóxico dos ríos.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.