Por Europa Press / Redacción | SANTIAGO DE COMPOSTELA | 14/09/2022 | Actualizada ás 19:17
O presidente da Xunta, Alfonso Rueda, subliñou este mércores a urxencia dunha "xestión áxil e eficaz" dos fondos europeos Next Generation para reforzar a contribución de Galicia ao desenvolvemento sustentable, a través dos seus principais proxectos empresariais innovadores.
Na súa intervención no I Observatorio dos Obxectivos de Desenvolvemento Sustentable (ODS), Rueda destacou a vontade de Galicia de liderar unha transformación industrial que teña na sustentabilidade un eixo prioritario, e puxo como exemplo tres iniciativas que están á espera de noticias por parte do Executivo central na asignación de fondos.
Particularmente, falou dos plans de Stellantis para construír en Vigo unha nova plataforma orientada á fabricación de coches eléctricos; os da multinacional xaponesa Showa Denko para elaborar ánodos de grafito na Coruña ligados á mobilidade sustentable; ou aos de Altri para levar adiante en Palas de Rei (Lugo) unha fábrica de fibras téxtiles, que permitiría a Galicia concentrar o 3% da produción mundial destes materiais.
O mandatario autonómico lamentou que unha ocasión como a dos fondos europeos "estea a quedar diluída pola falta de axilidade na execución", despois de que o Goberno decidise centralizar a distribución dos recursos, algo que criticou. Nesa liña, tendeu a man para ofrecer a experiencia xestora de Galicia na execución destes instrumentos.
BENESTAR SOCIAL
En referencia ás metas de benestar social e igualdade de oportunidades recollidas nos ODS, o titular do Goberno galego subliñou que a Comunidade será a primeira na que a educación será totalmente gratuíta para todos os nenos, en todas as escolas e durante toda a xornada, cun aforro por familia de ata 2.000 por fillo.
Así mesmo, engadiu, esta aposta tamén se estende á educación media, cun incremento do 50% no investimento en libros de texto; e na educación superior, dado que a Universidade galega ten conxeladas as taxas desde hai 12 anos.
Todas eses propósitos, agregou, "non se poderían atender sen prestar atención á sustentabilidade das contas". Nesa liña, Rueda avanzou que, grazas a ser a comunidade de réxime común con menor endebedamento desde 2009, o Parlamento autonómico aprobará nas próximas semanas uns Orzamentos que contemplarán novas rebaixas fiscais para axudar as familias, entre elas a equiparación a efectos de IRPF das familias de dous fillos coas numerosas, ou a actualización das axudas sociais conforme á inflación.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.