Por Europa Press / Redacción | OURENSE | 20/09/2022 | Actualizada ás 20:42
A portavoz nacional do BNG, Ana Pontón, participou este martes no mitin de presentación de Luís Seara como candidato da formación nacionalista á Alcaldía de Ourense, e valorouno como un aspirante "solvente", que devolverá a "dignididad" á institución municipal.
Pontón subliñou que Seara é a persoa "adecuada" para "recuperar o orgullo" da cidade de Ourense, con "vontade de cambio" e de transformar o municipio para mellorar a vida das persoas. "Tras anos de disparate, Ourense merece tranquilidade e bo facer", proclamou, e recalcou que o candidato nacionalista levará á cidade das Burgas "as boas prácticas en política municipal".
A portavoz nacional do BNG tamén apelou á importancia de obter un resultado "histórico" en Ourense, que será "clave" para darlle futuro á cidade e "superar o caciquismo do clan Baltar". Nese sentido, subliñou que Ourense "merece un novo rumbo", "volver ser faro de cultura", "confiar no seu potencial produtivo" e ter unha xestión eficaz que mellore a vida dos seus veciños.
Ana Pontón incidiu en que a alternativa non está en quen "forman parte do problema, cómplices necesarios da 'desfeita' institucional, económica e social", nin en "volver ao peor do pasado" da cidade. "Nas eleccións municipais está en xogo o futuro e a dignidade desta cidade, e teño a certeza de que imos gañar o partido con Luís Seara e cun BNG que ten a cabeza e o corazón nun Ourense de luces que, entre todos e todas, podemos acender", proclamou.
Segundo sinalou, as eleccións municipais de 2023 son o "primeiro paso" cara ao "cambio galego" e o BNG non escatimará esforzos, talento e traballo para que Ourense "forme parte deste tempo novo que Galicia merece".
"POLÍTICA CON MAIÚSCULAS"
Pola súa banda, Luís Seara reivindicou a "política con maiúsculas" e pediu aos ourensáns que "non compren" o discurso de que a política é algo "nocivo", e que todos os políticos son iguais. "A política é vocación de servizo, e para iso e por iso estou aquí", recalcou.
Na súa intervención, apostou por "transformar a realidade" da cidade buscando o equilibrio entre áreas urbanas e rurais, e non cinguirse a "asfaltar rúas ou pór bancos", para que Ourense recupere a súa "autoestima". "Esta é a gran tarefa colectiva que temos por diante, a de proxectar para transformar; transformar para devolver ao Concello ao lugar que merece, para xerar riqueza e benestar, para sentirnos orgullosos de pertencer a este marabilloso recuncho do planeta que se chama Ourense", afirmou.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.