Ana Pontón demanda ao Goberno apoiar ao sector da pesca de fondo e urxe un recurso ante a UE

A portavoz nacional do BNG, Ana Pontón, esixiu ao Goberno "contundencia" para evitar o veto á pesca de fondo e situarse "ao lado" do sector, ao expor a necesidade de recorrer a decisión da Comisión Europea sobre o peche de pesqueiras. Mentres reprochou ao PP e ao PSOE estar a botar "balóns fóra sobre a súa responsabilidade".

A preguntas dos xornalistas, nun acto do BNG na Coruña, cualificou de "mazazo" para o sector a medida da Comisión Europea e alertou da "destrución de emprego" que suporá nun "sector estratéxico".

"É impresentable que a estas alturas o Goberno central non se situou xa ao lado sector pesqueiro galego", dixo Pontón para quen nin o Goberno central nin a Xunta "fixeron ben o seu traballo". "É evidente que coñecían os plans da Comisión Europea", apostilou.

"Nin uns nin outros defenderon o sector pesqueiro de Galicia", recalcou a portavoz nacional do BNG para quen tanto PP como PSOE "tratan de botar balóns fóra sobre a súa responsabilidade".

"CONTUNDENCIA"

Ante a actual situación, demandou ao Goberno que actúe con "contundencia" e pida a suspensión cautelar da aplicación dun decreto que "non está ben xustificado desde o punto de vista económico e científico".

"Non vale un recurso dentro de dous meses, hai que solicitar a paralización cautelar desa medida, hai que actuar con rapidez, aínda están a tempo de porse ao lado de Galicia", insistiu.

Fíxoo despois de que a secretaria xeral de Pesca, Alicia Villauriz, asegurase que o Goberno español traballa para que a Comisión Europea (CE) reconsidere a súa decisión de pechar as pesqueiras nalgunhas zonas de augas profundas.

Respecto da posibilidade de que o Goberno presente un recurso, Villauriz explicou que é necesario ter unha avaliación "moi concreta e precisa" desde o punto de vista xurídico.

A portavoz nacional do BNG, Ana Pontón, en rolda de prensa.