O Goberno español prohibe a manifestación en defensa do topónimo auténtico da Toxa durante o Foro La Toja

Considera que "afecta a orde pública". A Mesa pola Normalización Lingüística, convocante desta protesta que coincide coa visita do Rei, avisa que sairá á rúa igualmente.

Por Europa Press / Redacción | Santiago de Compostela | 23/09/2022 | Actualizada ás 19:42

Comparte esta noticia

A Subdelegación do Goberno en Pontevedra prohibiu a manifestación a favor do uso do topónimo galego --e oficial-- de Illa da Toxa convocada pola Mesa pola Normalización Lingüística con motivo da celebración do IV Foro La Toja - Vínculo Atlántico.

Manifestación da Mesa pola Normalización Lingüística en Illa da Toxa, no Grove, para defender o topónimo oficial fronte ao Foro La Toja
Manifestación da Mesa pola Normalización Lingüística en Illa da Toxa, no Grove, para defender o topónimo oficial fronte ao Foro La Toja | Fonte: A MESA POLA NORMALIZACIÓN LINGÜÍSTICA.

Segundo a resolución da Subdelegación, esta protesta podería "afectar á orde pública" e a "seguridade de persoas e bens", coincidindo coa apertura deste evento a cargo do rei Felipe VI, entre outras autoridades.

No escrito, o Goberno remítese a informes emitidos pola Comandancia da Garda Civil de Pontevedra e a Policía Local do Grove. Con todo, A Mesa ve nesta prohibición "un especial interese en impedir a presenza de movementos sociais molestos ao poder, como a defensa e normalización da lingua galega".

Así, a entidade denunciou que o Goberno español "está a amparar con recursos e representantes públicos o desprezo polo pobo galego e a súa lingua".

A Mesa, que estuda recorrer esta decisión, asegurou que o día 29 sairá á rúa igualmente "para reclamar o cumprimento da Lei". "Todo o poder político e económico que se concentrará na Toxa non dará a impunidade para incumprir a lexislación", sentenciaron a organización.

Segundo o escrito da Subdelegación do Goberno en Pontevedra, "existen razóns fundamentadas" para estimar que a celebración da concentración "pode incidir negativamente" na seguridade de persoas e bens.

Ante isto, fixeron referencia ao lugar, que será a ponte da Illa dá Toxa, e sinalaron que ao ser a única vía de acceso á illa a inexistencia de alternativas apréciase como "un risco real" porque o desenvolvemento da concentración "imposibilitaría a prestación de servizos esenciais tales como bombeiros, policía ou urxencias médicas".

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta