O primeiro acordo en competencias entre Xunta e Estado español en 13 anos reportará 17 millóns de euros a Galicia

Galicia recadará directamente 17 millóns de euros do imposto sobre o depósito de residuos en vertedoiros, a incineración e a coincineración que lle cede o Estado, tras o acordo alcanzado este luns na Comisión Mixta de Transferencias Administración Xeral do Estado-Comunidade Autónoma de Galicia, que terá efectos desde o 1 de xaneiro de 2023.

Segundo a información achegada pola Xunta, esta é a cantidade estimada que a Consellería de Medio Ambiente aspira a recadar en Galicia, un imposto que se cobra en todo o Estado, xa sexa a través das comunidades ou da Axencia Tributaria. Así, se devengará a partir do 1 de xaneiro de 2023 e, en principio, prevese a súa autoliquidación a trimestre vencido.

Na explicación remitida pola Xunta recóllese que "a única competencia normativa" da que dispón a Xunta é a capacidade para "subir" os tipos, pero "non baixalos".

A Consellería de Facenda e Administración Pública confirmou, pola súa banda, que iniciará a tramitación da orde que regule os aspectos de xestión e os modelos de autoliquidación.

A cesión deste tributo constitúe o primeiro acordo con Galicia dos últimos trece anos, xa que a Comisión Mixta de Transferencias co territorio galego levaba sen reunirse desde o ano 2009.

Desta maneira, o Goberno central remitirá ás Cortes Xerais o anteproxecto de lei de modificación da Lei 17/2010, do réxime de cesión de tributos do Estado a Galicia e de fixación do alcance e condicións da devandita cesión.

"O Goberno reafirma o seu compromiso de diálogo permanente e cooperación institucional con todas as comunidades autónomas", asegurou o secretario de Estado de Política Territorial, Alfredo González. A delegación da Xunta estivo encabezada polo vicepresidente primeiro e conselleiro de Economía, Francisco Conde.