Por Europa Press / Redacción | Santiago de Compostela | 30/09/2022 | Actualizada ás 15:07
A débeda de Galicia sitúase en 11.824 millóns de euros no segundo trimestre, fronte aos 11.314 do primeiro trimestre e os 12.071 que rexistraba no mesmo período do ano anterior, segundo os datos que publica este venres o Banco de España.
Deste xeito, supón un 17,7% do produto interior bruto (PIB), mentres que hai un ano a débeda pública galega representaba o 19,8%, pero o primeiro trimestre estaba no 17,3%.
Pola súa banda, a Consellería de Facenda destaca que Galicia é a terceira comunidade cun menor cociente de débeda por habitante, ao situarse en 4.393 euros, fronte aos 6.699 euros da media. Engade que Galicia, co 17,7%, ten un diferencial positivo de 7,2puntos no segundo trimestre, e así o organismo sitúa á comunidade como a cuarta de réxime común con menor endebedamento de toda España.
Iso si, o cociente débeda/PIB subiu en Galicia en 0,4 puntos de marzo a xuño, do 17,3% ao 17,7%, debido a "un adianto no programa de endebedamento da Xunta no segundo trimestre ante as expectativas dun endurecemento das condicións de financiamento para final de ano", explica a consellería.
"O proceso de normalización das políticas monetarias, como consecuencia da intensificación e persistencia de elevadas taxas de inflación, está a encarecer o custo das novas emisións de débeda", sinala.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.