Chega a Galicia o reto para conseguir 10.000 doazóns de sangue durante outubro
As unidades móbiles de ADOS desprazaranse ata os sete campus universitarios.
Por Europa Press / Redacción | SANTIAGO DE COMPOSTELA | 05/10/2022 | Actualizada ás 12:11
A Axencia de Doazón de Órganos e Sangue (ADOS) e as universidades da Coruña, Vigo e Santiago de Compostela, colaboran no programa 'Reto 10.000', que chega a Galicia promovido desde a Rede Española de Universidades Promotoras de Saúde (REUPS).
Este reto, explican nun comunicado, busca conseguir durante o mes de outubro un total de 10.000 doazóns de sangue entre todos os centros universitarios que se sumen á iniciativa. Para iso, as unidades móbiles de ADOS desprazaranse durante todo o mes de outubro ata os sete campus universitarios. A primeira fase da campaña continuará ademais durante o mes de novembro.
Este mércores 5 poderá doarse nas facultades de Enfermaría e Podoloxía (Ferrol), E.T.S Arquitectura (A Coruña), Enfermaría (Santiago) e de Belas Artes (Pontevedra). Este xoves a unidade móbil desprazarase á facultade de filoloxía de Santiago de Compostela.
