Por Europa Press / Redacción | Santiago de Compostela | 16/10/2022 | Actualizada ás 12:30
A Fundación Franz Weber denunciou este domingo a proliferación de casos de sadismo contra animais en Galicia e advertiron ademais da súa "virulencia" e da "sensación de impunidade" que xera a non identificación dos autores destes sucesos.
A ONG puxo como exemplo os disparos a un gato rueiro na Estrada, que lle provocaron a perda dun ollo e graves lesións, a colocación de cebos con coitelas en varios parques de Vigo, cuxas consecuencias non só poderían afectar os animais senón tamén a nenos, ou a noticia dun cachorro decapitado brutalmente en Forcarei.
En todos estes casos, os naturalistas subliñan que se trata de "condutas constitutivas dun delito de malos tratos animais". Ante esta situación, a organización insistiu na urxencia de aprobar a reforma do Código Penal coas emendas que garantirían un endurecemento das penas contra os responsables de casos tan graves de crueldade.
Inciden tamén na necesidade de que a normativa autonómica desprega as actuacións relacionadas con campañas de sensibilización. "Por vía administrativa calquera dos casos apuntados suporían multas de ata 30.000 euros e a posibilidade de inhabilitar aos autores por un máximo de cinco anos para a tenencia de animais", detallan.
Lamentan que a Consellería de Medio Ambiente non desenvolvese medida algunha para previr situacións de malos tratos, "como tampouco lle parecen preocupar sucesos como o achado de varios mastines en estado de abandono en Padrón hai un mes".
De forma paralela FFW pide a todas as formacións políticas "altura de miras" para sacar adiante a futura Lei de Protección Animal estatal, despois de que PP, EAJ-PNV ou Vox presentasen emendas á totalidade reclamando a retirada do texto.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.