Santiago deixa de lado os localismos e apoiará a candidatura da Coruña para acoller a sede da Axencia de Intelixencia Artificial
Por Europa Press / Redacción | SANTIAGO DE COMPOSTELA | 31/10/2022 | Actualizada ás 22:56
Santiago apoiará a candidatura galega para acoller a Axencia Española para a Supervisión da Intelixencia Artificial porque "a unión dos activos de ambas as cidades fará que realmente A Coruña compita".
Tras unha nova reunión cos grupos políticos e axentes económicos e sociais da cidade, o alcalde, Xosé Sánchez Bugallo, que participou de forma telemática tras dar positivo en covid-19, fixo pública unha decisión "unánime".
"Como capital de Galicia temos o deber de apoiar a candidatura de Galicia e, aínda que discrepamos nos criterios que se empregaron para tomar esa decisión, nós non imos debilitala, imos colaborar con ela", esgrimiu.
A decisión foi tomada tras unha reunión na que participaron o alcalde, Xosé Sánchez Bugallo; varios concelleiros; os portavoces dos grupos da Corporación Municipal, o reitor da Universidade de Santiago de Compostela e representantes da Cámara de Comercio, o Club Financeiro, o Foro Cívico e da Asociación empresarial do Tambre.
Todos acordaron que, tras a decisión que tomou o Nodo de Intelixencia Artificial de apoiar a candidatura da Coruña, e aínda "discrepando nos criterios que se empregaron" para tomar a decisión, "diferentes aos que establece o decreto do Ministerio", o papel da capital autonómica é apoiar á candidatura galega.
<
