Foro do PSOE pontevedrés sobre o CGPJ onde participarán voces contrapostas arredor da súa renovación
A mesa redonda, organizada pola Comisión de Xustiza da Agrupación Socialista de Pontevedra, dará comezo ás 19:30 horas, terá entrada de balde ata completar aforo.
Por Galicia Confidencial | Santiago | 01/11/2022 | Actualizada ás 13:44
Os maxistrados Miguel Aramburu e José Luis Deaño protagonizarán este venres 4 de novembro no Salón de Actos da Facultade de Belas Artes (rúa da Maestranza) un foro titulado 'O Consello Xeral do Poder Xudicial, a debate'. A mesa redonda, organizada pola Comisión de Xustiza da Agrupación Socialista de Pontevedra, dará comezo ás 19:30 horas, terá entrada de balde ata completar aforo, será presentada pola secretaria xeral do PSOE pontevedrés, Maica Larriba, e moderada polo seu secretario de Xustiza, Pedro Hermida.
Trala boa acollida que tiveron os seus anteriores foros de debate sobre a 'Emerxencia Sanitaria na Atención Primaria' e 'A nova Lei de Apoio ás Persoas con Discapacidade', a Executiva Local Socialista pretende arroxar agora luz sobre un tema tan de actualidade como o funcionamento do Consello Xeral do Poder Xudicial, abordándoo desde os prismas dun membro de Xuíces e Xuízas para a Democracia (Miguel Aramburu) e dun da Asociación Profesional da Maxistratura (José Luis Deaño).
Miguel Aramburu García-Pintos (Pontevedra, 1968) licenciouse en Dereito pola Universidade de Santiago de Compostela en 1992. Vén traballando como xuíz desde o ano 1999 con diversos destinos, todos eles en Galicia.
É membro de Xuíces e Xuízas para a Democracia (JJPD) desde 1999, exercendo entre ese ano e 2001 como coordinador territorial da asociación en Galicia e entre os anos 2002 e 2004 como membro do seu Secretariado. Ademais, foi xuíz decano de Pontevedra de 2013 a 2017.
José Luis Deaño accedeu á carreira xudicial por oposición no ano 2007, tomando posesión en xullo de 2009 no Xulgado de Primeira Instancia e Instrución de Ribadavia (Ourense), cargo que ocupou até abril de 2015. Nesa data ascendeu á categoría de maxistrado, ocupando desde entón e ata 2017 o Xulgado de Instrución número 1 de Lugo. En maio dese ano foi destinado ao Xulgado de Primeira Instancia número 5 de Lugo, cargo que desempeña actualmente e que, de setembro de 2019 ata o 30 de xuño de 2022, compaxinou cunha comisión de servizos sen relevación de funcións na Sección Primeira (Civil) da Audiencia Provincial de Lugo.
Ademais, desde novembro de 2019 é membro da Sala de Goberno do Tribunal Superior de Xustiza de Galicia (TSXG).
