A candidatura 'Ponte...nas Ondas!' supera o último trámite para entrar no rexistro de boas prácticas da Unesco
En total, catro candidaturas de todo o mundo aspiran a obter este recoñecemento. Para Galicia, sería a primeira distinción nesta materia.
Por Europa Press / Redacción | SANTIAGO DE COMPOSTELA | 01/11/2022 | Actualizada ás 18:30
'Ponte... nas Ondas!', a candidatura conxunta de Galicia e Portugal que aspira a entrar no rexistro de boas prácticas de salvagarda do patrimonio cultural inmaterial da Unesco, superou o último trámite necesario previo á súa inscrición.
Segundo informa a Consellería de Cultura, o órgano de avaliación acaba de emitir informe favorable polo que recomenda que a proposta sexa inscrita, algo que se decidirá no comité intergobernamental que se celebrará en Rabat do 28 de novembro ao 3 de decembro.
En total, catro candidaturas de todo o mundo aspiran a obter este recoñecemento. Para Galicia, sería a primeira distinción nesta materia.
No informe, que xa está a analizar a Consellería de Cultura, Educación, FP e Universidades, os examinadores felicitan aos responsables por "un arquivo ben preparado que destaca a participación".
