A Xunta dará conta dos grandes lumes de verán case ao final do ano

O conselleiro de Medio Rural, José González, comparecerá no próximo pleno da Cámara galega para explicar o desenvolvemento da campaña de incendios, unha vez concluído o período de alto risco, e despois dos grandes lumes do inicio do verán que consumiron boa parte do parque natural do Invernadoiro e do Courel.

Esta comparecencia vén precedida dun verán especialmente virulento en canto aos incendios, que só no mes de xullo achegouse ás 40.000 hectáreas e que en agosto continuou coa mesma intensidade acompañados das altas temperaturas e dun verán especialmente seco.

Ademais, a principios de outubro, a Fiscalía provincial de Ourense incoou dilixencias de investigación penal por mor dunha denuncia presentada pola plataforma 'Por un Monte Galego con Futuro', polos lumes ocorridos en xullo e agosto na provincia ourensá, por mor do que se solicitou á Xunta información sobre os medios de extinción e tempos de resposta.

Un veciño de Senderiz en Lobeira observa un hidroavión traballar no incendio forestal na Serra do Leboreiro, no parque natural de Baixa Limia e Serra do Xurés | Fonte: Rosa Veiga - Europa Press - Arquivo