Ao 70 % das enfermeiras galegas non se lles recoñece o tempo de traballo extra para facilitar o cambio de turno

O Sindicato de Enfermaría (Satse) denunciou que entre o 60 % e o 70 % do persoal de enfermaría do Sergas "está a ser discriminado ao non recoñecerlles o solape de xornada", é dicir, "o tempo de traballo extra que realizan para facilitar ao compañeiro que lle releva sobre a evolución dos pacientes".

Satse sinalou nun comunicado que esta situación afecta a máis de 75.000 profesionais de enfermaría de Andalucía, Asturias, Cantabria, Cataluña, Castela-A Mancha, Galicia e Murcia, así como de Ceuta e Melilla. Así, indicaron que o recoñecemento deste dereito laboral iniciouse, no resto de comunidades autónomas, no ano 2000.

Ademais, estimaron que un enfermeiro que presta os seus servizos nun centro hospitalario fai "de media unhas 80 horas ao ano que non son recoñecidas como tempo de traballo".

Nesta liña, Satse dirixiuse por escrito ao conselleiro de Sanidade, xerentes de servizos de saúde e partidos políticos, "para que posibiliten o recoñecemento do solape de xornada".

Así mesmo, o sindicato reclamou que o solape de xornada "sexa compensado preferentemente tamén en tempo de traballo", como xa sucede en Baleares, Euskadi, Estremadura, Castela e León, Navarra e Comunidade Valenciana.

Enfermeiras nas súas labores | Fonte: Eduardo Parra