Por Galicia Confidencial | Valladolid | 18/11/2022 | Actualizada ás 19:10
Pontevedra busca que as súas riquezas gastronómicas sexan recoñecidas en todo o Estado. Tras converterse nun auténtico embaixador do estilo de vida pontevedrés na pasada edición de Fitur, o xa célebre "Paco" estivo en Valladolid para exhibir na Feira Internacional do Turismo de Interior (Intur) os "talentos gastronómicos, riqueza medioambiental e patrimonial e beleza da cidade onde mellor se vive e come do mundo".
Con el estiveron a concelleira de Promoción Económica e Turismo, Yoya Blanco, e o concelleiro de Desenvolvemento Sostible e Medio Natural, Iván Puentes, nunha edición onde destacaron as potencialidade de Pontevedra como un destino verde. Neste sentido, Yoya Blanco destacou que están "contentos" porque "moita xente preguntou pola cidade". "Temos demostrado co proxecto Pontevedra Capital Gastro que non só vivimos ben, senon que comemos ben cun producto de proximidade", sinalou.
Pola súa banda, Iván Puentes lembrou que esta feira está especializada en enoturimos e en ecoturismo "que son as apostas fortes que fai Pontevedra", tras a presentación da estratexia Pontevedra flúe. "O obxectivo que temos é evolucionar cara esa cidade verde que queremos e con capacidade de xerar emprego co mundo verde e co turismo", sinalou.
A cidade do Lérez presentou unha nova peza audiovisual, realizada por Fernando Portela, na que o célebre e sibarita protagonista percorre espazos tan emblemáticos como o parque das Palmeiras, o Mercado de Abastos, Santa María, Ruínas de Santo Domingo ou as prazas da Peregrina, A Ferrería, Méndez Núñez e A Leña, para amosar as "inxentes e irresistibles tentacións culinarias" dos restaurantes pontevedreses.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.