Unha estufa provoca un pequeno lume no mercado de Nadal de Vilagarcía

Dúas estufas provocaron nas últimas horas problemas en Galicia. En Vilagarcía de Arousa, pasadas as 13.00 horas, rexistrouse un incendio nunha caseta do Mercado de Nadal, o que supuxo a atención médica dunha persoa con queimaduras nas mans.

A orixe do lume foi un calefactor, tal e como explicaron os Bombeiros do Salnés, aínda que sen máis consecuencias que o propio aparello e algo de madeira.

No operativo tamén participaron os membros do Servizo Municipal de Emerxencias, os axentes da Policía Local e o equipo de Urxencias Sanitarias de Galicia-061, que prestou asistencia á persoa lesionada.

Tamén no Barco de Valdeorras houbo un pequeno incidente polo estilo. 

Segundo inclúe o parte da Central de Coordinación de Atención ás Emerxencias, os bombeiros da comarca explicaron que a situación se desencadeou sobre as 12.30 horas na Rúa Regueiral cando, ao querer acender a estufa, o demandador de butano estaba ao máximo da súa potencia e provocou unha explosión.

Isto supuxo danos importantes na cociña e unha leve intoxicación do ocupante da vivenda, quen foi atendido no mesmo lugar polo equipo de Urxencias Sanitarias de Galicia-061, sen que fose necesario o seu traslado.

En relación aos danos, os efectivos de extinción contabilizaron un forno, a cociña como electrodoméstico, a porta da estancia e o muro que a divide co salón.

Así, os bombeiros procederon á desconexión da bombona de butano e á depuración do ambiente co fin de garantir a salubridade do aire. Ata o lugar, tamén acudiron efectivos da Garda Civil.