A Eurocámara tamén pide axilizar os permisos de eólicas ou paneis solares
Pide acurtar de 12 a 9 meses o procedemento.
Por Europa Press / Redacción | BRUSELAS | 14/12/2022 | Actualizada ás 20:34
O Pleno do Parlamento Europeo instou á Comisión Europea a acelerar os procedementos necesarios para obter permisos para plantas de produción de renovables, tales como paneis solares e aeroxeradores, ou adaptar as xa existentes.
En concreto, o Parlamento pediu acurtar de 12 a 9 meses o procedemento de autorización de novas instalacións de enerxía renovable, así como para reformar as xa existentes, se se sitúan nas chamadas 'áreas de aceleración', que cada Estado deberá determinar en función da súa capacidade para avanzar nese ámbito, unha medida da que foi relatora o eurodeputado galego socialista Nicolás González Casares.
Deste xeito, se a autoridade competente non responde o prazo establecido, o permiso considerarase concedido, en aplicación do principio de 'silencio administrativo positivo', como propoñen os eurodeputados nas súas emendas á proposta da Comisión Europea.
Fóra desas zonas, o procedemento non poderá levar máis de dezaoito meses, no canto dos 24 meses da proposta inicial, e en canto á adaptación das plantas existentes para aumentar a súa potencia, os eurodeputados queren que a concesión de permisos non tarde máis de seis meses.
Con todo, os Estados membro deberán reducir ao máximo o impacto ambiental á hora de designar as zonas de aceleración de renovables, das que quedarán excluídos os lugares da rede Natura 2000, os parques e reservas naturais, así como as rutas migratorias de aves e mamíferos mariños, excepto as superficies artificiais e construídas, como tellados, aparcadoiros ou infraestruturas de transporte.
