Jácome retrasa os bonos de 100 euros que nun principio eran para gastar no Nadal a "febreiro, marzo ou abril"

En setembro dixo que a súa intención era lanzar este bono para gastar directamente no pequeno comercio, aínda que naquel momento dicía que estaría "facilitado para gastar nas festas do Nadal".

Por Europa Press / Redacción | VIGO | 15/12/2022 | Actualizada ás 18:20

Comparte esta noticia

O alcalde de Ourense, Gonzalo Pérez Jácome, volveu a insistir na súa promesa de que repartirá bonos de 100 euros entre os veciños da cidade para gastar en comercios e bares, subliñando que está pendente a aprobación das bases e que se habilitará entre febreiro e marzo.

"Mantemos a filosofía de que vai axudar moito ao comercio local", sostivo Pérez Jácome, que xa comunicaba a finais de setembro aos portavoces dos grupos políticos a súa intención de lanzar este bono para gastar directamente no pequeno comercio, aínda que naquel momento dicía que estaría "facilitado para gastar nas festas do Nadal".

Finalmente atrasou a data e agora o rexedor da cidade das Burgas sitúa a operatividade dos bonos entre febreiro e marzo, ou "mesmo o mes de abril", unha axuda, dixo, para os cidadáns que "non resolve o mes", pero "está pensada para revitalizar o comercio e a hostalaría". "Son axudas indirectas para hostalaría e comercio a través dos cidadáns, porque unha familia que teña cinco persoas recibirá 500 euros", expresou.

Do mesmo xeito, criticou as propostas do Bloque Nacionalista Galego, que pedía que se limitase os beneficios do comercio e a hostalaría a un máximo de 5.000 euros por establecemento. "Son propostas desnortadas", dixo o rexedor, lamentando que "se se atendese a todas as propostas burocráticas" da formación nacionalista "habería que facer un curso para poder gastar o bono".

Con todo, dixo que si haberá un límite nos comercios, pero non de 5.000 euros "porque sería surrealista". Así relatou que "na campaña dos libros", onde había unha axuda de 200.000 euros, houbo librarías que "venderon 80.000 euros e outras 30.000". "Hai trinta librarías en Ourense, se se pon un máximo de 5.000 euros só poderían comprar uns poquitos libros", reclamou.

Por iso, avanzou que o límite será de 80.000 euros para os comercios en xeral e de 40.000 euros na hostalaría, "aínda que se podería variar se se enchen enseguida". A partida económica para facer fronte ao cheque, para os veciños censados na capital da provincia, é de 10 millóns de euros e nela participan tamén a Confederación de Empresarios de Hostalaría de Ourense e a Federación de Comercio de Ourense, aínda que o fan cunha "achega simbólica" de 1.000 euros.

O alcalde lembrou tamén que o único que terán que facer os ourensáns é baixar unha aplicación na que xa aparecerá o bono e poderán entrar con el "a calquera sitio a gastalo". Ademais subliñou que aqueles que non teñan novas tecnoloxías recibirano en papel, "irán a calquera tenda e gastarano igual, máis fácil imposible", sentenciou,asegurando que "todo está en marcha e todo perfecto".

CITAS DO 1 DE XANEIRO

Noutra orde de cousas, o alcalde anunciou que a cidade de Ourense dará a benvida ao 2023 coa edición número XXX da Carreira Furtiva da Subida á Costiña de Canedo, unha proba que se desenvolverá o día 1 de xaneiro ás 13,00 horas.

"Un rito iniciático para dar a benvida da mellor forma ao ano", dixo Pérez Jácome, lembrando que se celebrará ao día seguinte doutra cita popular, a da Carreira de San Silvestre, que percorrerá as rúas da cidade para despedir o 2022.

A proba, de 2 quilómetros de subida e 1 de media subida, poderá realizarse andando, correndo ou en bicicleta. Non será necesaria a inscrición e ao chegar poderase tomar unha copa de champaña ou un chocolate.

Jácome tamén lembrou outros puntos da programación de Nadal con propostas como o Poboado de Nadal, que desde mañá está aberto ao público na Praza de Bispo Cesáreo, o parque de aventuras con tirolinas ou un teatro infantil no Xardín do Posío. Tamén o Ballet de Kiev que representará o Lago dos Cisnes ás 19.00 horas no Auditorio, o 1 de xaneiro, e xa ten as entradas á venda.

Xunto a estas citas, expuxo que o espazo expositivo que acolle o Belén de Baltar, na praza de San Cosme, nestas datas terá un horario especial, abrindo de forma ininterrompida desde este sábado ata o 6 de xaneiro entre as 11,30-14,00 horas e de 17,30 a 20,30 horas.

O alcalde de Ourense, Gonzalo Pérez Jácome, na presentación da programación do Nadal. CONCELLO DE OURENSE
O alcalde de Ourense, Gonzalo Pérez Jácome, na presentación da programación do Nadal. CONCELLO DE OURENSE

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta