Salvamento de centolas: 60 quilos incautados en Marín foron devoltos ao mar

Axentes da xefatura da Policía Autonómica en Pontevedra incautaron esta semana 63,5 quilos de centola no marco dun dispositivo de control e rastrexo de produtos pesqueiros desenvolvido no porto de Aguete, en Marín, en colaboración co Servizo de Gardacostas de Galicia.

Tal e como detallan nun comunicado, os policías detectaron unha embarcación da que se descargaban produtos pesqueiros e se introducían no interior dun vehículo. Ao inspeccionalo, localizaron no maleteiro catro cestos coas centolas e, dado que o condutor e patrón da embarcación carecía de documentación de transporte de mercadorías, procederon ao seu comiso.

Tamén levantaron acta de denuncia por diferentes infraccións á Lei de Pesca de Galicia, como o exceso de peso de captura establecido para a embarcación, a descarga dos produtos pesqueiros nun porto non autorizado, e o transporte de mercadoría sen documento e nun vehículo non autorizado.

Informaron ademais de que todas as centolas comisadas, ao estar vivas, foron devoltas ao mar da zona.

Centola comisada pola Policía Autonómica en Marín | Fonte: Xunta