Mellora de 66 paradas de autobús en Vedra, Dodro, Padrón, Rois, Santiago e Teo
Por Europa Press / Redacción | SANTIAGO DE COMPOSTELA | 02/01/2023 | Actualizada ás 10:58
O delegado da Xunta na Coruña, Gonzalo Trenor, acompañado polo alcalde de Vedra, Carlos Martínez, informou que o Diario Oficial de Galicia (DOG) publicou este luns o anuncio polo que se somete a información pública o proxecto de mellora de 66 paradas de autobús en seis concellos da comarca de Santiago que suporán un investimento de 1,8 millóns de euros.
Tal e como informou o Goberno galego nun comunicado, as 66 paradas que se someteron este luns a información pública atópanse situadas na zona sur de Santiago, concretamente nas estradas AC-241, AC-242, AC-301, AC-307, AC-453, AC-543, AC-841 e AC-960. Intervencións que afectarán a un total de 55 parcelas, a cuxa expropiación se destinarán algo máis de 70.000 euros.
Así, no Concello de Vedra melloraranse dez paradas, en Dodro dúas, outras dúas en Padrón, en Rois nove, en Santiago oito e en Teo un total de 35 paradas.
Segundo explicou Trenor, as intervencións previstas suporán o acondicionamento dos carrís para a parada de autobús, a mellora da accesibilidade e a pavimentación da contorna coa execución de sendas ou beirarrúas.
Tamén se prevé a instalación de novas marquesiñas, ademais de actuacións complementarias de drenaxe, condución de servizos ou colocación de varandas para protexer aos usuarios onde poida haber desniveis.
Esta iniciativa trátase dun dos proxectos do Plan de mellora da seguridade e accesibilidade das paradas de autobús nas estradas autonómicas, co que a Xunta ten previsto investir ao redor de 35 millóns de euros para a mellora de 1.100 paradas de autobús en toda Galicia.
