Formoso sobre Besteiro como candidato á Xunta: "Sobre ese tema xa dixen o que tiña que dicir"
O líder dos socialistas galegos manifestou hai uns días que se Gómez Besteiro quería ser candidato á Xunta contaría con todo o seu "apoio por xustiza e lealdade persoal".
Por Europa Press / Redacción | SANTIAGO DE COMPOSTELA | 04/01/2023 | Actualizada ás 16:17
O secretario xeral do PSdeG, Valentín González Formoso, remitiuse ás declaracións realizadas hai uns días nun encontro informativo sobre a idoneidade de que José Ramón Gómez Besteiro poida ser candidato do partido á Presidencia da Xunta nos próximos comicios.
"Sobre ese tema xa dixen o que tiña que dicir a semana pasada", dixo este mércores durante unha visita a Ferrol, antes de desviar a resposta á pregunta cara a outras cuestións.
"Agora toca seguir preocupándose da vida e a problemática das galegas e galegos e de cuestións tan reais como as axudas de transición, de se Stellantis ten unha plataforma de vehículo eléctrico asignada no primeiro semestre, de cando empezan a modernizarse as fragatas F-100 (de Navantia), de se Sentury é unha realidade ou de se Showa Denko na Coruña amplía as súas instalacións. Iso é o que realmente nos ten que preocupar", enumerou.
O líder dos socialistas galegos manifestou hai uns días que, tras o arquivo da última causa que tiña pendente no marco da Operación Pulpo, se Gómez Besteiro quería ser candidato á Xunta contaría con todo o seu "apoio por xustiza e lealdade persoal".
CANDIDATO EN NARÓN
Formoso si se referiu este mércores á situación da Agrupación Socialista en Narón, o oitavo municipio de Galicia en número de habitantes, de cara ás eleccións municipais do próximo maio. Lembrou que o partido está "en proceso de selección, cumprindo os prazos estatutarios do partido". "E confío en que nos próximos días se coñeza" a decisión sobre a persoa que liderará a lista, engadiu.
"O PSOE vai presentar un proxecto que sexa capaz de ilusionar a naroneses e naronesas", garantiu. Nese sentido, considera que o municipio "necesita un novo impulso como o que tivo nos 80 e 90 da man de Xoán Gato".
"O partido ten os seus estatutos e serán a militancia e as direccións as que decidan as candidaturas, sempre pensando non en nomes e apelidos, senón en beneficiar á cidadanía de Narón", dixo.
González Formoso explicou que Narón é "unha das excepcións ás primarias", decisión que xustificou en que "dentro do mapa galego" os socialistas entenden "que necesita este impulso político e económico", polo que queren "dalgunha maneira ter capacidade para facer o mellor equipo".
"Non podemos permitir que nunha organización con 148 anos de historia o criterio ou o proxecto persoal estea por encima das siglas: nin en Narón nin en ningún sitio", concluíu. O PSOE de Narón cogoberna co partido maioritario, Terra Galega, desde o ano 2011.
