Pardo de Vera aposta por aclarar as causas do accidene do autobús para "evitar que volva pasar"

A secretaria de Estado de Transportes, Mobilidade e Axenda Urbana, Isabel Pardo de Vera, subliña que o que lle "importa" é "aclarar as causas" do accidente do autobús que se produciu en Noiteboa en Cerdedo-Cotobade para "tentar pór todas as barreiras para que non se produzan" sinistros "tan desgraciados como este".

"Efectivamente xa había programadas actuacións", respondeu ás preguntas dos medios de comunicación en relación coa vía na que se produciu o accidente, durante un acto este venres na Mariña de Lugo.

En calquera caso, Pardo de Vera indicou que "hai que ter en conta que se están investigando as causas do accidente ou as multicausas do accidente con toda a transparencia" e engadiu que "en principio non era un tramo de concentración de accidentes".

Ocorreu, segundo agregou, "un día moi chuvioso". "Por tanto, hai que velo", sinalou, para a continuación destacar que o que lle importa é "aclarar as causas para tentar pór todas as barreiras para que non se produzan accidentes tan desgraciados como este".

Un equipo especializado da Garda Civil participa na reconstrución do accidente do autobús sinistrado no río Lérez | Fonte: Europa Press