Sobe un 30% a emisión de gases invernadoiro e a produción eléctrica fósil en Galicia en 2022
A produción renovable representou o 64% do total, lonxe do 100% que debe supor en 2030, cun estancamento debido á baixada do 46% da contribución de encoros.
Por Europa Press / Redacción | SANTIAGO DE COMPOSTELA | 16/01/2023 | Actualizada ás 14:32
O Observatorio Galego da Acción Climática (Ogacli) alerta de que a produción eléctrica fósil incrementouse un 26% en Galicia en 2022, o que contrasta coa caída do 19% das enerxías renovables.
Así, avisa de que se produciu un incremento de gases invernadoiros asociados á produción de electricidade en 2022 tras catro anos consecutivos de baixada en Galicia, con 3,5 millóns de toneladas, o que se traduce nun aumento de ao redor do 30% respecto de 2021.
Con base en datos de Rede Eléctrica de España (REE), Ogacli subliña que a transición eléctrica "retrocedeu" en Galicia durante 2022, de forma que as emisións de gas invernadoiro asociadas á produción eléctrica galega volveu aumentar despois dunha senda descendente desde 2018.
Mentres, a produción renovable representou o 64% do total, lonxe do 100% que debe supor en 2030, cun estancamento debido á baixada do 46% da contribución de encoros. Pola súa banda, a xeración eólica só tivo un leve avance do 2%, aínda que segue como a principal fonte enerxía en territorio galego.
En cambio, a suma de produción das centrais de ciclo combinado a gas fósil das Pontes e Sabón igualou o seu máximo histórico de 2008, "converténdose na segunda fonte en 2022, quedando só detrás da eólica". E é que a central de carbón das Pontes, cuxa autorización de peche quedou parcialmente suspendida polo Ministerio para a Transición Ecolóxica, "case duplicou a súa produción en relación a 2021", aínda que só representa o 4% do total.
"Trátase dun importante paso atrás na descarbonización da xeración de electricidade que, a pesar de diminuír moito as súas emisións no que levamos de século por causa do desenvolvemento renovable e da caída no uso de carbón, segue sendo unha das maiores fontes de gases contaminantes de cambio climático no noso país (16% en 2020)", remarca esta entidade nun comunicado.
Así mesmo, exponse que os datos ata agora dispoñibles, do nove primeiros meses do ano, indican unha diminución na demanda do 20% en 2022, o que se achaca á caída industrial pola paralización da planta de aluminio de Alcoa, en San Cibrao.
