BNG á Xunta: "Queren que funcione mal o compost para poder queimalo en Sogama"

O deputado do BNG Luís Bará atribuíu "continuos vaivéns" á Xunta en materia de residuos, ao que a directora xeral de Calidade Ambiental, Sostibilidade e Cambio Climático, Sagrario Pérez, respondeu sinalando que é o Goberno central o que, ao seu xuízo, perpetra unha "agresión" a concellos pola lei básica que incorpora impostos "que lle van a custar" aos municipios.

Foi na comisión parlamentaria de medio ambiente onde Bará preguntou este venres polos criterios do Executivo autonómico para bonificar o 15% do canon de Sogama. Foi o propio presidente da Xunta, Alfonso Rueda, quen anunciou no seu día que este exercicio se introduciría unha bonificación do 15% no recibo de Sogama a todos os municipios que se comprometan a instalar o quinto colector, o colector marrón, para seguir mellorando o procedemento de separar residuos.

"Hai que priorizar o compost. Vostedes queren que funcione mal para poder queimalo en Sogama. Non queren que funcione ben ou teñen outros intereses inconfesables. Teñen que incentivar a compostaxe local, e non excluír", recriminou o nacionalista.

Pola súa banda, a titular de Calidade Ambiental replicou que "si se aposta" polo compost e advertiu que o 73% dos concellos que están no sistema Sogama poderanse beneficiar da bonificación e "moitos" dos restantes, tamén.

EÓLICO

Á marxe disto, Bará e Pérez cruzaron reproches pola tramitación de proxectos eólicos, ao asegurar o deputado do Bloque que "non é de recibo" o que está a facer a Xunta coa emisión de declaracións de impacto ambiental e avisou de que a formación fará "todo o posible por parar este ataque sen precedentes contra o país".

"Antes", remarcou a directora xeral, deberán "facer exame de conciencia". E é que, segundo incidiu, a situación actual é "consecuencia do decreto estatal".

Luís Bará en rolda de prensa.. BNG