Rueda volve confiar en Pedro Puy como coordinador do programa electoral do PPdeG nas municipais
Por E.P. | SANTIAGO DE COMPOSTELA | 29/01/2023 | Actualizada ás 16:38
O portavoz parlamentario do PPdeG, Pedro Puy, será unha vez máis o responsable da elaboración do programa marco do partido para as eleccións municipais do próximo 28 de maio. Así llo comunicou o presidente dos populares galegos, Alfonso Rueda, que mantén a confianza en Puy, que xa foi o encargado de coordinar os programas cos que o PPdeG concorreu ás últimas convocatorias electorais.
Segundo destacou o PPdeG nun comunicado, o portavoz do grupo parlamentario popular no Parlamento de Galicia será o encargado de garantir a coordinación e o intercambio de información entre o equipo de campaña galego e nacional, unha vez recollidas as cuestións específicas de cada concello e de cada sector.
"Trataremos de facer un programa aberto á sociedade galega, recollendo todas as súas propostas e necesidades", manifestou Pedro Puy.
