Por E.P. | SANTIAGO DE COMPOSTELA | 01/02/2023 | Actualizada ás 18:49
O PPdeG levará ao Congreso unha proposición non de lei a través da que se solicita ao Goberno central que habilite un rexistro centralizado onde poder obter o certificado de titularidade das contas, saldos e posición bancarias dunha persoa falecida, coas cautelas que esixa a lexislación vixente.
Segundo trasladaron o Grupo parlamentar dos populares nun comunicado, a deputada no Parlamento de Galicia Felisa Rodríguez reuniuse este mércores cos deputados do PP no Congreso Javier Bas e Xoán Constenla para trasladarlles esta proposición xa aprobada por unanimidade na Cámara galega.
Rodríguez indicou que o obxectivo é "facilitar aos herdeiros o acceso á información para cumprir as obrigacións legais e tributarias con certeza, claridade e seguridade". Nesta liña, apuntou que o PPdeG considera que este rexistro debería "estar incluído no Ministerio de Xustiza" e sería "complementario aos rexistros do certificado de defunción, as últimas vontades e os contratos de cobertura de seguros de falecemento".
Deste xeito, subliñou a necesidade de poder coñecer as contas bancarias da persoa falecida, "coas precaucións, limitacións e cautelas que esixa a normativa vixente de protección de datos", xa que isto "evitaría cobros e pagos non desexados, e facilitaría o proceso de aceptación de herdanza".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.