O PP de Betanzos rexeita cambiar de nome a avenida Fraga Iribarne: "É unha figura clave na Transición"
Ademais, sinala o custe económico que isto suporía para as empresas
Por Europa Press / Redacción | A CORUÑA | 02/02/2023 | Actualizada ás 19:45
O Grupo Municipal do Partido Popular de Betanzos rexeita o cambio de nome da avenida Fraga Iribarne, exposta pola única concelleira do BNG no consistorio a través dunha moción. Nun comunicado, os populares sosteñen que a concelleira nacionalista "fundamenta a súa esixencia na suposta aplicación de Lei da Memoria Democrática".
"Máis aló de que Manuel Fraga foi presidente da Xunta en catro ocasións co respaldo maioritario do pobo galego é, ademais, un dos pais da Constitución Española e unha figura clave na Transición", á marxe, sinala, da súa etapa como ministro de Franco.
O PP incide, ademais, no custo económico. "As empresas terían que cambiar o nome da rúa no seu domicilio social, este trámite ten un custo para cada empresa duns 500 euros", cita como exemplo.
