Carnota sofre o segundo grande incendio do ano en Galicia
Xa levan ardidas máis de 100 hectáreas.
Por Europa Press / Redacción | Carnota | 13/02/2023 | Actualizada ás 10:27
A Consellería do Medio Rural deu por controlado o incendio forestal que permanecía activo no municipio coruñés de Carnota e que calcinou xa 125 hectáreas, a maior parte delas de monte raso, segundo a última actualización da Xunta. Este é o segundo gran lume en Galicia no que vai de ano.
En declaracións aos medios na inauguración dos encontros do Plan Conecta FP Galicia co sector forestal-madeira, o conselleiro do Medio Rural, José González, lamentou a "desgraza" de que un coche se incendiase e provocase este lume.
Con todo, sinalou que, "despois dunha noite de moito traballo", o incendio permanece estabilizado cunha afectación de preto de 125 hectáreas. Así mesmo, manifestou que "non houbo vivendas en risco", aínda que nalgún caso, por precaución, "debido ao fume que houbo preto, decidiuse mover á xente".
O lume iniciouse ás 15.07 deste domingo na parroquia de San Martiño de Lariño e tivo a súa orixe no incendio dun vehículo na estrada AC-550, que provocou que o lume saltase a terreo forestal. No punto traballan un técnico, 11 axentes, 17 brigadas, 13 motobombas, dúas pas e un helicóptero.
Segundo confirmou a Europa Press o alcalde da localidade, Juan Manuel Saborido, a partir das 04.00 horas da madrugada deste luns "a situación mellorou". Agora, sinalou que "están a caer catro pingas" e iso "axuda a controlar o lume".
Ademais, Saborido detallou que non houbo que desaloxar a ningún veciño das súas vivendas, aínda que algún si decidiu abandonala pola súa propia vontade ao haber persoas con mobilidade reducida nos seus domicilios.
ACTIVADA ALERTA
En todo caso, o rexedor afirmou que se activou un protocolo de actuación para avisar aos veciños da zona de que o lume se atopaba próximo e para manter a precaución con persoas que puidesen ser vulnerables.
Así mesmo, o alcalde de Carnota confirmou que o lume tivo orixe nun vehículo que ardeu nunha área de descanso na estrada AC-550. Ao parecer, segundo explicou, o condutor do vehículo sentiu que o coche comezaba a quentarse de forma inusual e decidiu parar e arrimarse ao carón desta área de servizo, que está pegada ao monte polo que se iniciou o incendio forestal.
