Por Europa Press / Redacción | SANTIAGO DE COMPOSTELA | 14/02/2023 | Actualizada ás 19:08
A plataforma SOS Sanidade Pública lamenta que a Xunta de Galicia responda o "clamor social" da manifestación do pasado domingo, con miles de persoas en Santiago, con "máis privatización".
"Tras a gran manifestación do pasado día 12 de febreiro no Obradoiro, con máis de 50.000 persoas que encheron a praza e colapsaron Santiago, a Consellería de Sanidade informa de que vai realizar de maneira inmediata negociacións coa patronal de hospitais privados e cos colexios médicos para suprimir a dedicación exclusiva do persoal médico que traballa nos hospitais públicos e permítelles que traballen tamén na privada", apunta nun comunicado.
A este respecto, lembra que a patronal da sanidade privada galega (Ahosgal), "con presenza de multinacionais e fondos de investimento estranxeiros", "recoñeceu recentemente que necesita 120 médicos máis para atender os concertos coa pública". Igualmente, critica que "os colexios de médicos galegos, o outro actor da negociación, carece de representatividade, xa que os seus órganos de dirección están elixidos por menos do 10% da profesión e teñen graves conflitos de interese".
Ademais, SOS Sanidade Pública censura que "grazas ao políticas desmantelamento do sistema sanitario público e a dobre dedicación público-privada, promovidas polo Partido Popular nas comunidades onde goberna, a sanidade pública perdeu o ano pasado 4.200 traballadores mentres a privada gañou 9.500". Igualmente, alerta de que os seguros privados creceron un 20% no último ano en Galicia, á vez que remarca que a poboación "rexeita maioritariamente a dedicación público-privada".
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.