Premio de igualdade do PSdeG a Rosa Gómez Limia, primeira deputada de esquerdas do Parlamento galego
Os premios de igualdade do PSdeG foron creados en 2015 co obxectivo de recoñecer o traballo feito en favor da igualdade entre homes e mulleres, ou ben que permitan visibilizar as discriminacións por razón de sexo.
Por Europa Press / Redacción | SANTIAGO DE COMPOSTELA | 17/03/2023 | Actualizada ás 15:27
O Partido Socialista de Galicia distinguiu co seu premio de igualdade 'Maruja Vázquez Suárez' a Rosa Gómez Limia, a primeira deputada de esquerdas da historia do Parlamento galego; así como á agrupación Mulleres Salgadas, que agrupa a 1.600 traballadoras da pesca, o marisqueiro e da acuicultura.
Nun comunicado, o PSdeG explica que o xurado decidiu galardoar a Rosa Gómez Limia en recoñecemento do seu activismo feminista e o seu "firme papel desenvolvido en defensa da igualdade". Ademais, no apartado de colectivos, distingue á asociación Mulleres Salgadas pola súa "loita constante contra as desigualdades no sector da pesca".
Os premios de igualdade do PSdeG foron creados en 2015 co obxectivo de recoñecer o traballo feito, tanto por persoas individuais como por colectivos, en favor da igualdade entre homes e mulleres, ou ben que permitan visibilizar as discriminacións por razón de sexo.
Tras un período de suspensión, a celebración destas distincións retomouse no ano 2022 para chegar este ano á súa cuarta edición. Os galardóns levan o nome de Maruja Vázquez Suárez (Santiago deCompostela, 1894-Miño, 1936), mestra republicana e socialista asasinada os franquistas ao comezo da Guerra Civil.
O acto de entrega dos IV Premios de Igualdade Maruja Vázquez Suárez celebrarase na segunda quincena do mes de abril tras o fallo emitido por un xurado integrado por 12 mulleres e presidido pola secretaria de Igualdade do PSdeG, Silvia Fraga.
Rosa Gómez Limia naceu en 1943 en Ourense. Perito e xornalista de formación, converteuse, da man do PSdeG, na primeira muller deputada de esquerdas da historia do Parlamento de Galicia. Nas eleccións municipais de 1979, encabezou a candidatura socialista en Mugardos, onde pasou a xestionar a primeira tenencia de Alcaldía, así como as comisións de Cultura, Educación, Deportes e Facenda. Neste ano, só dúas mulleres encabezaron listas na provincia da Coruña.
En canto á asociación Mulleres Salgadas, constituíuse en decembro de 2016, tendo como ámbito de traballo a ría de Arousa, que despois foi ampliando para converterse na primeira e única asociación de rango autonómico galego de mulleres do sector pesqueiro. O seu obxectivo principal é mellorar a situación das traballadoras galegas do mar e actividades relacionadas, prestando especial atención á escasa presenza de mulleres en postos de dirección.
