Paula Prado: "Fixemos unha transición exemplar. Non podemos permitirnos entrar en liortas internas coma están outros partidos"

O pasado mes de febreiro, o presidente do PP galego, Alfonso Rueda, confirmou que vostede ía ser a directora de campaña nas eleccións municipais do 28 de maio. Como está a afrontar a responsabilidade que este reto supón?

Esa é a palabra, responsabilidade. O PP é un partido de goberno e temos que trasladar á cidadanía un proxecto responsable, solvente e serio, mais tamén de unidade. Onde gobernamos aspiramos a seguir facéndoo, e alí onde non o facemos temos a obriga de presentar unha alternativa que sexa atractiva, o que pasa irremediablemente polo proxecto. Niso estamos traballando agora. Temos xa os candidatos e candidatas e os seus equipos, e agora eles ocúpanse das listas e de trasladar o noso proxecto a cada concello, tendo en conta as particularidades de cada cidade e vila.

Despois dos resultados dos últimos comicios municipais, e tendo en conta o actual escenario, cales son as expectativas do PP para esta cita electoral?

Partindo da base de que somos o único partido que presenta candidatura nos 313 concellos, defendemos que somos os que máis nos parecemos a Galicia, porque fomos capaces de conseguir eses 313 candidatos e candidatas. Non renunciamos a nada, porque vemos como a tendencia nas enquisas é á alza e somos o único partido que estamos subindo en intención de voto. Neste sentido, a marca do PP está forte.

Por outra parte, vemos como o PSOE está intentando que esta campaña teña unha lectura en clave estatal e referendar as políticas do presidente Pedro Sánchez. Nós intentamos trasladar que o goberno de Sánchez prexudica a Galicia.

Van ter un papel clave estas eleccións municipais nos comicios estatais de finais de ano e nos galegos do ano que vén?

No ano 2019, é evidente que non obtivemos un bo resultado nos comicios municipais, e aspiramos claramente a mellorar ese resultado. Por que? Porque estamos seguros que un mellor resultado nas eleccións do 28 de maio vai a supoñer un empuxón para o presidente Feijoo e despois para o presidente Rueda.

Falando de Alberto Núñez Feijoo, por primeira vez nos últimos quince anos, o ex presidente da Xunta non participará de forma activa no total da campaña das eleccións municipais. Como se xestiona esta situación á hora de coordinar unha campaña, tendo en conta que, despois do ex presidente Manuel Fraga, Núñez Feijoo é a figura máis importante do PP galego?

No último ano fomos capaces de facer a transición de Alberto Núñez Feijoo a Alfonso Rueda dunha maneira absolutamente exemplar, sen fisuras, con moitísima unidade e con moitísima responsabilidade. Non podemos permitirnos entrar en liortas constantes como están outros partidos. As enquisas a nivel autonómico corroboran o traballo realizado polo presidente Rueda e o PP nestes doce meses. En canto ao presidente Feijoo, en Galicia coñécese ben a súa capacidade solvencia e de xestión. Telo en Madrid, aspirando ao cambio no Goberno estatal, é un aliciente para os galegos e galegas a tomarse estas eleccións como un primeiro paso para levalo á Moncloa. Máis que un problema, vémolo como unha oportunidade.

Nas últimas, semanas, tanto o BNG como o PSdeG centraron o foco na situación de precariedade que sofre a sanidade pública galega. As críticas van dirixidas especialmente á falta de medios na Atención Primaria. Como afronta o PP esta cuestión que é negativa, xa que son o partido que está na Xunta e que asume as competencias sanitarias?

Penso que os datos avalan unha boa xestión no ámbito da sanidade, por moito ruído que faga a esquerda. Os galegos e as galegas valoran que cando van á sanidade pública a atención é magnífica. No barómetro da sanidade estatal que presenta o Ministerio Sanidade, a valoración da sanidade galega está por enriba dos estándares do resto de sanidades. Agora ben, atopámonos nun contexto no que hai unha falta de médicos en todo o Estado. Algo está pasando na sanidade pública que nos está afectando a todos, polo que botarlle a culpa ao goberno galego resulta sorprendente e nos dá a medida do que é a oposición en Galicia.

Non é un problema nin de cartos nin de recursos. Faltan profesionais na sanidade, e por iso nós lle pedimos ao Goberno español que nos deixe formar máis médicos MIR para poder incorporalos á sanidade e lle pedimos tamén que nos dea a especialidade de urxencias. O Executivo estase negando a esas dúas cuestións, que son fundamentais para resolver os problemas de falta de médicos. Non é un problema nin de Ayuso nin de Rueda, todas as comunidades autónomas están nunha tensión pola falta de médicos, e así o vemos coas manifestacións. Se o problema fose só en Galicia, só habería manifestacións aquí.

A xente valora que cada vez hai máis centros de saúde, máis hospitais e máis aparatos. Estamos innovando para dar a mellor atención posible, e a xente cando acode ao médico sabe que a van atender nuns días. Se a esquerda quere deostar a sanidade e os profesionais da sanidade, fraco favor lles fan. Non xestionaron nunca un só euro público, e por iso están tendo un discurso alleo á xestión do día a día dun servizo público tan importante como é o da sanidade. Cos datos desmontamos todo o discurso falaz da oposición.

E vostedes, onde queren poñer o foco de cara a estas eleccións municipais?

Nós contrapoñemos o noso proxecto aos que poñen os intereses partidistas por enriba dos intereses xerais. Por exemplo, vémolo estes días coa Lei do ‘só si é si’, cun BNG que se viste de feminista pero vota en contra da derrogar a lei. É un falso feminismo e están facendo que o movemento feminista sexa antipático para a xente. Estámoslle dando armas á xente que deosta o feminismo.

Por outra parte, votar ao Partido Socialista é votar ao partido de Pedro Sánchez. O que rebaixou o delito de malversación, o que eliminou o delito de sedición, o que ten no Congreso dos Deputados un grupo sen identificar involucrado no caso ‘Mediador’.  É o Partido Socialista do Pedro Sánchez que non arranxa o viaduto do Castro, que non trouxo os trens de Alta Velocidade para Galicia, que non nos permite aprobar os Pertes de automoción nin nos dá os fondos europeos para a industrialización. A xente que vota aos alcaldes socialistas estalle dando osíxeno a Pedro Sánchez, e iso é letal para Galicia.

Neste momento e salvo contadas excepcións, o PP é a única formación de dereitas con capacidade real para obter representación na maioría dos concellos galegos. Esa falta de potenciais sociais pode supoñer unha debilidade?

Nós sempre apostamos porque goberne a lista máis votada, pero para iso é necesaria unha reforma da lei electoral. Mentres iso non ocorra, se nos falta un voto para a maioría absoluta corremos o risco de que se produza un pacto de perdedores. Ao PSdeG e ao BNG dálles igual o resultado electoral. Se entre os dous suman un concelleiro máis que o PP, van pactar e gobernar entre eles.

Para nós iso é unha fortaleza, porque lle trasladamos á cidadanía que só pactamos con eles nas urnas, e porque mostramos un modelo de goberno baseado de estabilidade, sen liortas internas de gobernos de coalición e cun programa que se vai cumprir por completo.

Iso non quita que poidamos chegar a acordos, como xa facemos no Parlamento galego, onde hai iniciativas da oposición que se aproban cos nosos votos porque consideramos que son boas para a cidadanía. Non é só o que queira o PP. Se hai propostas que son beneficiosas e melloran a vida da xente, loxicamente tamén as aprobamos.

Días atrás, o ex portavoz de Ciudadanos en Ourense, Pepe Araújo, anunciou que se uniría á candidatura do candidato popular na cidade, Manuel Cabezas. Está o PP a traballar para incorporar novos activos políticos, mesmo aqueles que proveñan doutras formacións?

Somos un partido aberto a todas as persoas que se senten identificadas co noso proxecto. Sempre e cando acheguen algo ao PP, teñen as portas abertas. No caso de Ourense, Manuel Cabezas considera que Pepe Araújo é unha persoa deste tipo e por iso a incorpora. Hai exemplos noutras moitas vilas e cidades. Insisto, somos un partido aberto e por iso temos candidaturas nos 313 concellos de Galicia. O proxecto do BNG non atrae, e por iso non chegan á totalidade do país. Un proxecto baseado no feminismo e no ecoloxismo radicais, na independencia, non pode ser atractivo para os galegos e galegas.