O BNG esixe solucións inmediatas ante as “graves deficiencias” das bases aduaneiras galegas
A formación pide investigar a presenza de amianto nos buques e advirte da falta de medios en Ribadeo, Muros e Vigo.
Por Europa Press / Redacción | Santiago de Compostela | 18/07/2025 | Actualizada ás 17:43
O BNG rexistrou no Congreso unha iniciativa para esixir ao Goberno central solucións inmediatas ante as "graves deficiencias" nos medios materiais das bases galegas do Servizo de Vixilancia Aduaneira (SVA), especialmente nas de Ribadeo, Muros e na base aérea de Vigo. O deputado do BNG no Congreso, Néstor Rego, alertou da "inoperatividad" de dúas embarcacións tras detectarse a presenza de amianto, o que supón un "risco evidente" para a saúde do persoal.
Nun comunicado, tamén denunciou que o helicóptero da SVA con base en Vigo leva máis de cinco meses en reparación, sen previsión de retorno ao servizo. "Non é admitible que o Goberno pretenda substituir os buques contaminados con amianto por outros barcos tamén obsoletos e con máis de 40 anos, o que supón unha irresponsabilidade absoluta desde o punto de vista da seguridade e da eficacia do servizo", afirmou Rego.
A formación nacionalista fixo referencia ás informacións da Dirección Adxunta de Vixilancia Aduaneira (DAVA) que indica que se pretende cubrir estas baixas con outros buques que "xa superaron con fartura a súa vida útil". O BNG reclama ao Executivo central que analice todos os buques construídos antes da prohibición do uso de amianto como illante naval para determinar a súa situación real e garantir a saúde do persoal embarcado.
N-V EN LUGO
Noutra orde de asuntos, Rego presentou unha batería de preguntas ao Ministerio de Transportes para coñecer os plans previstos polo Goberno para arranxar a N-V ao seu paso por Lugo. O portavoz do BNG no concello de Lugo, Rubén Arroxo, afirmou que o "mal estado" de varios tramos da N-V necesita de actuacións urxentes.
"Vemos un grave estado de abandono, especialmente na zona nordés, cunha calzada chea de buracos e gretas, ademais dun firme moi deteriorado que implica un serio risco para a condución e a seguridade viaria", lamentou Arroxo.
Por iso, o BNG reclama unha "intervención urxente" que permita mellorar os "problemas graves" detectados en sete tramos diferentes, incluíndo zonas como a saída de Lugo en dirección a Madrid, a avenida dás Américas, a contorna de Garabolos, o acceso á avenida Breogán ou o lugar de Xián.
