Carmela Silva ve a Alfonso Rueda "moi nervioso" e di que iso xustifica os "tantos erros" que comete
Achacoulle "pouco peso político, pouca empatía, pouca capacidade de analizar os retos do futuro e planificar as respostas, pouca capacidade de comunicarse coa cidadanía e pouca amabilidade"
Por Europa Press / Redacción | SANTIAGO DE COMPOSTELA | 02/04/2023 | Actualizada ás 20:02
A presidenta da Deputación de Pontevedra, Carmela Silva, comentou que ve ao presidente da Xunta, Alfonso Rueda, "moi nervioso" e achacoulle "pouco peso político, pouca empatía, pouca capacidade de analizar os retos do futuro e planificar as respostas, pouca capacidade de comunicarse coa cidadanía e pouca amabilidade". "É un modelo desfasado", asegurou.
Nunha entrevista concedida a Cadea Ser Galicia e recollida por Europa Press este domingo, Silva xustifica nese nerviosismo os "tantos erros" que considera que comete o líder do Goberno autonómico. "Comigo aínda non se reuniu, nin con outros presidentes de deputacións, que xestionamos o mundo local, sobre todo dos concellos de menos de 20.000 habitantes, que son a maioría esmagadora", afeou.
"Creo que está moi nervioso polo a boa acción do Goberno do Estado, pola posición tan potente do PSdeG, porque estamos moi fortes a nivel municipal e xógase moito, xa que foi designado a dedo polo anterior presidente da Xunta", sinalou.
NOMEAMENTOS DE MIÑONES E BESTEIRO
A presidenta da Deputación pontevedresa tamén abordou os últimos cambios no PSdeG cos nomeamentos do exdelegado do Goberno en Galicia, José Miñones, como novo ministro de Sanidade e do exsecretario xeral dos socialistas galegos, José Ramón Gómez Besteiro, como delegado na comunidade.
Para Silva, os galegos recuperan así "posición" a nivel estatal. "Galicia ten un amigo no Goberno do Estado, unha voz para as reclamacións", indicou, mentres que con Besteiro, "cunha forte relevancia política", "está a facerse xustiza".
Entre os dous nomes, Silva evita pronunciarse sobre un futuro candidato a presidir a Xunta de Galicia. "Non estamos no momento de falar de nomes de candidatos. Iso é moito avanzar. Estamos coas municipais, nas que imos ter moi bos resultados. Vexo un PSdeG forte, con ganas, animado. Non estamos nese debate", asegurou. Calquera persoa que considere que pode liderar o proxecto do PSdeG, continuou, "debe ter a oportunidade". "No PSdeG hai grandes valores políticos", apuntou.
En canto ao seu futuro como presidenta do ente provincial, Carmela Silva afirmou que "é unha honra poder ser a presidenta da Deputación" e que estaría "encantada" de repetir. "Creo ademais que a Deputación fixo un labor excelente, con grandes transformacións. Somos a referencia en políticas de mobilidade amable, de recuperación do espazo público e de políticas de igualdade e de memoria histórica, ademais dunha administración que está a conseguir moitos recursos dos fondos europeos", defendeu.
POLÉMICA POLO VENTRE DE ALUGUER
Por outra banda, respecto da polémica desencadeada polo emprego dun ventre de aluguer por parte da actriz e presentadora Ana Obregón para ser nai, a responsable da Deputación tachou de "absolutamente intolerable" que o PP se abrise a iniciar un debate sobre a súa legalidade en España.
"É unha das cuestións centrais da axenda feminista impedir que se poidan alugar ventres de mulleres, convertelas en vasijas, en mercadoría a esas mulleres e ao nenos produto desa animalada, porque é unha animalada", argumentou.
"Eu dígolle ao PP que volva ver 'O conto da Criada' porque ao final é do que estamos a falar, de converter ás mulleres en mercadorías, en escravas, de usar a reprodución como instrumento de negocio e beneficio. Os desexos non son dereitos", concluíu.
