Por Europa Press / Redacción | SANTIAGO DE COMPOSTELA | 12/04/2023 | Actualizada ás 13:44
A falta dun mes para o arranque da campaña electoral para as eleccións municipais do 28 de maio, a cita coas urnas protagonizou este martes uno dos debates da sesión de control do Parlamento de Galicia, no que o presidente da Xunta, Alfonso Rueda, afeou ao PSdeG que só se acorde dos maiores "cando se achegan as eleccións".
En resposta a unha pregunta na que o portavoz parlamentario dos socialistas, Luís Álvarez, acusou á Xunta de "precarizar e privatizar" a atención aos maiores, Rueda acusou ao PSdeG de facer "política da mala". "Agora que se achegan as eleccións, fan o de sempre, agora acórdanse dos maiores e vólvense a acordar despois para descualificalos, para faltarlles ao respecto, porque din que os maiores votan ao PP, coma se iso fose un defecto", sinalou.
Tras iso, manifestou: "Os maiores votan ao PP porque se fían de nós, porque cren que facemos as cousas ben. Salvo que vostedes crean que son parvos. Eu desde logo non o creo". O titular da Xunta aproveitou para lembrarlle a Luís Álvarez que "todas as residencias que promove a deputación socialista de Lugo están a xestionarse de forma privada". "Doulle máis datos. Sabe que porcentaxe de concellos gobernados polo PP teñen o sistema de asistencia domiciliaria xestionado de forma privada? O 30%. Sabe que porcentaxe dos gobernados polo PSOE xestiónano de forma privada? O 50%", afeoulle Rueda, que instou ao socialista a "mirar un pouco para dentro".
O PSDEG ACUSA Ao PP DE "PRECARIZACIÓN E PRIVATIZACIÓN"
En fronte, o portavoz do Grupo Socialista, Luís Álvarez, asegurou que o modelo de residencias públicas que "teñen que construír" as deputacións presididas polo PSdeG non lle gusta ao PP porque prefire "precarizar e privatizar a atención ás persoas maiores".
Tras referirse ao recente anuncio do presidente da Deputación da Coruña, Valentín González Formoso, da construción de catro novas residencias públicas, o dirixente socialista censurou que o Goberno galego incumpra a promesa realizada por Feijóo no 2017 de facer sete residencias con 900 prazas públicas nas grandes cidades galegas e emprazou a Rueda a "dicir un prazo certo" para a posta en marcha destas infraestruturas.
O dirixente socialista, así mesmo, acusou á Xunta de deixar sen executar dos orzamentos de 2022 un total de 23 millóns do programa de Atención ás persoas maiores e dependentes. "E mentres que Galicia ten un déficit de 14.000 prazas públicas, o Goberno galego o único que garante é que oito de cada dez prazas de maiores sexan privadas", censurou.
Se tes problemas ou suxestións escribe a webmaster@galiciaconfidencial.com indicando: sistema operativo, navegador (e versións).
Agradecemos a túa colaboración.