200 quilos de haxix, un de cocaína e 8 de marihuana intervidos nun operativo en Vilanova

Un dos detidos era coñecido das forzas de seguridade pola súa relación coa distribución de drogas.

Por Europa Press / Redacción | VIGO | 15/05/2023 | Actualizada ás 09:53

Comparte esta noticia

O operativo antidroga desenvolvido a pasada semana en Vilanova de Arousa saldouse finalmente con dous detidos, e 200 quilos de haxix, un quilo de cocaína e 8 quilos de marihuana intervidos, segundo informaron fontes policiais.

A Operación Baroña púxose en marcha por parte da Policía Nacional a principios de maio, cando os axentes tiveron coñecemento de que unha vivenda construída nunha leira estaba a ser utilizada como almacén de seguridade dunha partida de droga pertencente a unha organización criminal asentada na comarca.

O pasado martes, tras varios días de vixilancia, os policías observaron un coche con dous ocupantes que accedía ao inmoble. Unha vez que abandonaron o lugar, os axentes déronlles o alto cando se ían a incorporar a un viario.

Tras identificar os ocupantes do vehículo (un resultou ser un vello coñecido das forzas de seguridade, pola súa relación coa distribución de drogas), realizouse unha inspección do coche e localizáronse no maleteiro 100 quilos de haxix.

Posteriormente, nunha entrada e rexistro da vivenda, interviñéronse outros 100 quilos de haxix, un quilo de cocaína e dúas bolsas cun total de 8 quilos de marihuana. Os dous detidos pasaron a disposición do xulgado de instrución 1 de Vilagarcía de Arousa, que decretou o ingreso en prisión dun deles, mentres que para o outro ditou prisión eludible cunha fianza de 30.000 euros. Ambos están investigados por un delito contra a saúde pública.

Haxix intervido na detención
Haxix intervido na detención | Fonte: Europa Press

Comparte esta noticia
¿Gústache esta noticia?
Colabora para que sexan moitas máis activando GCplus
Que é GC plus? Achegas    icona Paypal icona VISA
Comenta